Niederrheinische Liederhandschrift von 1574

[fol. 83v]

[Jch weiß mir noch ein Jůngkfraw fein]

1. Jch weiß mir noch ein Jůngkfraw fein,
Die hat mein hertz vmbfangenn,
Sey ist die allerliebste meinn
Noch ihr tragh ich verlangenn,
Sey ist sehr hůpsch vnd darzů feinn
Sey ist die allerliebste mein,
Och liebte zů tragenn, ist gein pein,
Als liebte mit liebte gelonet magh sein.

2. O fortuna wolts dů nicht vmmeschlaenn,
das sey mir eins můcht gebůeren,
Och můcht ich troest von ir empfaenn,
nicht liebers wer ich begehren
nochtannig so wol ich stedigh sein
Sey ist meins hertzen ein medecin,
Jch sagh dir lieb es ist groes pein,
Aůs trawrigenn hertzen froelich zů seinn.

[fol. 84r]

 

 

 

3. Nochtannigh so wil ich stedigh sein,

 

Als můcht sey mir gebůern,

 

Vmb sey so leidenn ich groesse peinn,

 

Jr wesenn vertreibt mein trawrenn,

 

Wann ich ansehenn ihrenn klaerenn scheinn,

 

So erfrewt sich das iůnghe hertze mein

 

Och lůstigh vnnd růstigh ist er darahnn

 

der liebte verborgenn tragen kahn.

 

 

 

4. O lieber got gib mir ohnn spott,

 

die reine liebe zů tragenn,

 

vnnd der verleůst sein gelt vnnd gůt,

 

vmb freůnden vnd aůch vmb magenn,

 

Der tragt die rechte lieb allein,

 

Jch sagenn eůch Jungkfrawenn ins gemeinn

 

Vil lieber zv pleibenn der ich binn,

 

dan das mir ein ander soll komenn in meinenn sin.