Niederrheinische Liederhandschrift von 1574

[fol. 95v]

[Mir ist ein Feines medtlein]

1. Mir ist ein Feines medtlein,
Gefallenn inn meinen sinn,
Ach Gott solt ich ihr diener sein
mein trawren wer dahin,
Gein dagh vnnd nacht hab ich gein rawe,
Das schaft ihr schoenn gestaltt,
Jch weis nicht, wie ich im wyderthůe,
meinn feins lieb macht mich alt.

2. Dem medlein ich gernn dienenn will,
Wen ich mit foegen kůnte
Darůmb hab ich der Nieder vill,
das mirs nit werdt vergůnt,
Jch hof sey solts erfahren baldt
wie ichs so trewlich meindt,
Aůf erden ichs mir nit wůnschenn wolt,
den sein bey ir alleine.

[fol. 96r]

 

 

 

3. Dem metdlein ich mein traw versprach,

 

Zů ehrenn vnnd anders nicht,

 

Als was doch from vnnd [e]hrlich ist,

 

Darnach ich mich stedes richtt

 

Solt denn mei[n] traw verlohrenn sein,

 

Krenckt mir mein sin v[nn]d gemůete,

 

Jch hof sey solts erfahrenn schein

 

mein sach sol werden gůet.

 

 

 

4. Den was die valsche zůngen thůendt

 

ist Jetzůndt ahn dem tage,

 

Ach dů mein feinns Braůnsmedtlein,

 

Hor zů was ich dir sage,

 

Halt dich nů stets in ehrenn alleinn,

 

Wie ich dich hertzlieb meine

 

So beheltes dů gůnst mit dieser kůnst,

 

das gleůb dů mir medtlein reine.

 

[fol. 96v]

 

 

 

5. Damit wil ich dem Medlein,

 

gesůngn haben vrey

 

Zů gůeter nacht ein Liedelein,

 

Alles gůit wůnsch ich ir darbey

 

Darmit das sey gedenck an mich

 

Wen ich nicht bey ir bin,

 

so behůet dich Gott mein feines leib,

 

Ade ich fahr darhin.