Niederrheinische Liederhandschrift von 1574

[fol. 136v]

[Groeß liebt hat mhir vmbfangen]

1. Groeß liebt hat mhir vmbfangen,
hertz alderliebste mein,
nach ihr sthaet mein verlangenn
whan eß nhůie kůndt gesein,
frůntlich mit ihr zů schertzen,
Das wher der wille mein,
ich bein ihr holt ihm hertzen
Darůmb tragh ich groess schmerzen,
wol ihnn dem hertzen meinn.

2. Ich gingh mir ein mhal spatzheren
Důrch einen gronen waldt
Dhar hůirdt ich vogelin klinckeleren,
sei singen Jůngh vnd aldt
ich hůirdt sei voer anderen allen
die hertzalderliebste mein,
sei sangh mit hellem schallen
noch dhet sei mhir besser gefallen
Dann andern waltvogelein

3. Nhui singh důrch des leben gots gůden,
hertz alderliebste mein
Das dich der liebe gott wil behůdn
die ich mit treůen mein
die ich mit treůen mein
Das weis der liebe gott,
sei ist ein Jůnghfraůe reine
wher ich bei ihr alleinen,
mein traůren mogt ich wol lhan.

[fol. 137r]

 

4. Es gehet gegen Deses neůes ihar

 

gegen dese frolige zeit,

 

was dreit sei off ihrem gellen kraůs haer

 

ein krentzlein wol bereidt,

 

Das krentzlein ist bewonden

 

mit blomlein verges meiner nicht,

 

mogt mir das krentzlein werden,

 

nicht besser mogt ich begeren,

 

von der hertz alde[rlie]bste mein.

 

 

 

5. Diß lidtlein sei dhir gesůngen,

 

adde zů goth nacht

 

gott straff alle falsche zůngen

 

die vns beiden haffen veracht,

 

ghar schon ist sei gezeret

 

Die hertzalderlibste mein,

 

sei hat ein frůntlich wesen,

 

Darůmb hab ich sei aůserlesen

 

fůir anderen Jůngfreůelin fein.