Niederrheinische Liederhandschrift von 1574

[fol. 148r]

[Vyll glucks spricht man haidt nyder vyll]

1. Vyll glucks spricht man haidt nyder vyll
Daß hassen der kleffer haidt keyn Zyll
noch acht ich nicht yhr neyden
Waß gott bescherdt
bleybt mir vnbewerdt
meyn gluck soll mir woll bleyben.

2. Daiß hasen nhu nit gunnen wildt
Jch hoffe auff got der ist meyn Zyll
Der wirdt mich nit verlaissen
vnd mich behuten grundichlich
fur allen die mich hassen.

3. Darum will ich frisch aůff vnnd frolich seyn
Der allerlybsten syngen diß leydtlin
glůck soll mich woll erfreůen
Daß dů solß seyn die lybste meyn
Jn allen traůen Jch dich meynen.

4. Vnnd ob eß hedt eyn sulchen scheyn
allß hedt Jch gantz vergessen deyn
foirdthin ohn allen schmerzen
soe thoe Jch doch gantz lieben dich
auß grundt meynes Jůngen hertzen.

5. Vnnd ob Jch gleych nit bie dir kan seyn
soe Jst myne liebe Jedoch nit dahin
bie dir bin Jch mit gedancken
gedenck dů ahn mich gleych Jch ahn dich
thoe du von mir nit wancken.

6. Vnd ob eß dairzů kome das Got
eynen vom andere neme
soe wůnsche Jch vnß zů diser stundt
auß hertzen grundt
daß wir vnß zů gleychen sehen moigen
Jn den aůgen.

7. Adde frent zů guder nacht
wollen got beůelen vnser sach
ehr soll vnß mit verlaissen
ehr vnnd Wirth nhoe zu vnß haben wildt
ehr weyß woll zeytt vnd maßen.