Noordnederlandse Historiebijbel

17 capittel

Doe Abram was in sijn 99ste jaer, doe openbaerde hem God ende seide: "Abram, Ic ben die almachtige God. Wandert voir My ende weest volmaect. Ic sette mijn vrede tusschen u ende Mi ende sel u seer groet maken ende menichvoudigen." Abram viel op sine knyen voer Gode.

Doe seide God: "Gi selt een vader wesen van voel volcs. Ende voirtan en sel gi niet hieten `Abram', mer gi selt hieten `Abraham', want Ic sel u setten een vader over voel volcs. Ende Ic sel u geslacht groet doen wassen,

[fol. 10vb]

want van u geslacht sellen coningen voirtcomen."

Doe seide noch God tot Abraham: "Bewaert minen vrede ende doet dat Ic u gebiede ende u geslacht na u. Besnijt uselven ende alle mannepersonen van uwen huusgesin, also wel die huerlingen als die van u geslacht sijn. Ende dat besnyden sel wesen dat vel voer van der manlicheit. Ende die van u geslacht na u geboren sel worden, die sel men altoes besnyden op den 8 dach na der geboerten mit enen mes gemaect van eenre leyen. Ende so wat manpersoen niet besneden en wort, die sel ofgesceiden worden van sinen volc als van sinen maechscap."

Doe seide God voert tot Abraham: "Saray, u wijf, die en sel gi niet meer nomen `Saray', mer haer naem sel wesen `Sara'. Ende Ic selse gebenedien ende Ic sel u van haer enen soen geven; die sel Ic gebenedien. Ende van sinen geslacht sellen coningen voirtcomen." Doe viel Abraham op sine knyen ende lachede in sijnre herten ende hi seide: "Sel ic in minen honderste jaer kint winnen ende sel Sara in haer 90ste jaer kint ter werelt brengen?" Doe seide Abraham tot God: "Sel Ysmahel, mijn soen, voer U niet leven?"

Doe seide God tot Abraham: "Sara, u wijf, sel u enen soen voertbrengen ende sinen naem sel gi nomen `Ysaac'. Ende Ic sette mijn vrede tusschen

[fol. 11ra]

Mi ende hem in der ewicheit ende in sijn geslacht na hem, opdat si mijne wet houden. Ende van Ysmahel heb Ic u gehoert. Siet, Ic sel hem gebenedien ende Ic sel sijn geslacht vermenichvoudigen. Van hem sellen geboren worden 12 hertogen. Ende Ic sel hem setten over voel volcs. Ende int ander jaer so sel Sara u een soen voertbrengen. Ende doe sciet God van Abraham.

Ende opten selven dach doe besneet hem Abraham, doe hi out was 99 jaer. Ende hi besneet Ysmael, doe hi out was 13 jaer. Ende hi besneet al sijn huusgesin die mit hem dienden, also wel die vreemde huerlinghen als die ingeboren.