Noordnederlandse Historiebijbel

48 capittel

Doe Jacob te bedde bleef leggen, dat wort Joseph geboetscapt. Doe nam Joseph sijn twee kinderen Manasses ende Effraym ende ghinc tot sinen vader. Ende doe Joseph tot sinen vader quam, doe en kende hi hem niet, want hi was half blint van ouderdom. Doe seide Jacob: "Wie sie gi?" Doe seide Joseph: "Ic ben Joseph, u soen. Ic coem tot u om te besien wat gi doet." Doe rechte hem Jacob op ende ghinc sitten int bedde.

Doe sach hi daer kinder staen ende seide: "Wie sijn die kinderen?" Doe seide Joseph: "Het sijn mijn kinderen, die mi God in desen lande verleent heeft." Doe seide Jacob: "Brenctse tot mi, opdat icse mach gebenedien." Doe nam Jacob die kinder in den arm ende cussetse ende seide tot Joseph: "Ic en ben nie van u verscalct. Daerom toecht mi God u kinderen." Doe rechte Joseph sinen vader op ende dede hem sitten voir dat bedde. Ende die kinderen knyelden voir hem, Manasses ende Effraym. Doe leide Jacob sijn rechterhant op Effrayms hoeft, die die joncste was. Ende sijn lufterhant leide hi op Manasses hoeft. Ende hi gebenedidese ende seide: "Mijn God, in wes aensicht mijn vaderen gewandert hebben, Abraham ende Ysaac; Here God, die mi gevoet hebt van minen jongen dagen tot desen dage toe; die engel Gods die mi bescermt heeft van voel quaets, die gebenedie dese kinderen ende voech op hem mijns vaders naemen, Abraham ende Ysaac. Ende

[fol. 31rb]

God doese wassen ende menichvoudigen op der aerden." Doe Joseph sach dat sijns vaders rechterhant lach op sinen joncsten soen, doe nam Joseph dat swaerlic ende nam sijns vaders rechterhant ende woudse leggen op Manasses, sijns outste soen, ende seide tot sinen vader: "Vader, aldus en hoertet niet, want gi lect u rechterhant op den joncsten." Doe seide Jacob: "Ic wetet wel, zoen, ic wetet wel! Manasses sel vermenichvoudigen onder den volc Gods. Mer sijn jonge brueder sel meerre wesen ende sijn geslacht sel wassen in heydenen." Doe settede Jacob Effraym voir Manasses ende seide tot Joseph: "Als ic doot ben, so sel God mit u wesen ende sel u geslacht van hene leden int lant uwer vaderen. Daer geef ic u geslacht een deel uut uwen bruederen dat lant dat ic wan van dien Amorreen mit minen swaerde ende mit minen boge."