Noordnederlandse Historiebijbel

Vijf capittel

Doe ghinc Moyses ende Aaron tot Pharo ende seiden: "Dit seit God, die Heer van Ysrahel: Laet mijn volc gaen

[fol. 37ra]

in der woestinen ende daer sacrifici doen." Doe seide Pharo: "Wie is die Here, dat ic sijn woerden soude horen ende laten die van Ysrahel gaen? Ic en kenne die Here niet ende ic en laet die luden niet gaen." Doe seide Moyses ende Aaron: "Der Ebreeuschen God heeft ons geropen, dat wi alle gaen souden 3 dachvaerden in der woestinen ende souden onsen Here ende onse God sacrificie doen. Tensi dat gi ons laet gaen, gi selt siecten crigen of verslegen worden." Doe seide die coninc tot Moyses ende tot Aaron: "Waerom raet gi dat volc van haren wercken? Laetse te werc gaen, want si worden seer voel. Ende waert dat si ledich ghingen, si souden voel meer worden. Daerom, verswaertse in dat werc ende laetse tegelen ende stenen maken, als si plegen. Ende laetse die missche ende die vulnis dregen ende verlichtense niet. Mer sentse overal in den lande ende laetse die vulnis vergaderen." Doe wort dat volc verstroeyt in Egipten ende haren arbeit wort verswaert. Ende die mannen van Egipten die dwongen die kinder van Ysrahel te wercken. Ende si slogense ende deden hem voel verdriets an.

Doe quamen die somme tot Moyses ende seiden: "Gy spraect mit Pharo om ons te vrien ende wi sijn nu voel meer belast!" Doe keerde hem Moyses totten Heer

[fol. 37rb]

ende seide: "Here, waerom sende Gi mi tot Pharo? Seer dat ic mit hem gesproken hebbe van uwen wegen, so heeft hi u volc meer verdriets angedaen. Ende Gi en hebtse niet verlost." Doe seide die Here tot Moyses: "Nu sel gi sien, wat Ic Pharo doen sel mit mijn stercke hant. Hi selse laten gaen."