Noordnederlandse Historiebijbel

15 capittel

Cantemus Domino: gloriose enim honorificatus est; equum et assensorem proiecit in mare. Etcetera. Ende dien psalm maecte hi al uut. In dien psalm staen twee vaersen. Soe wat mens onder moerdenaers of rovers quaem ende seide die drie vaersen driewerven mit gueden betrouwen op God, hi sel doer die vianden gaen, ongescaet. Dat eerste vaers staet int ewangelium ende die ander twee staen in desen psalm. Ende dit sijn die vaersen: Jhesus autem transiens per medium illorum ibat. Irruat super eos formido et pavor, in

[fol. 41vb]

magnitudine brachii tui; Domine, fiant immobiles quasi lapis, donec pertranseat populus tuus iste quem possedisti.

Doe die kinder van Ysrahel over dat Rode Meer waren, doe dancten si Gode ende ghingen alle avonts mit processien totten meer, also lange als die hoechtijt duerde. Ende si dancten Gode dat si van Pharons handen verlost waren. Ende Maria, Aarons suster, die nam een bonge. Ende alle vrouwen volchden haer na mit bongen ende mit snaerspul. Ende Maria sanc voir ende seide: "Laet ons Gode singen enen gloriosen lofsanc, want die paerden ende haer opsitters die sijn verdrenct."

Daerna nam Moyses den kinder van Ysrahel ende ghinc daermede in der woestinen van Sur. Ende hi ghinc drie dagen, dat hi geen water en vant. Doe quamen si in Marath. Daer vonden si water, mer dat was bitter, soedat ment niet drinken en mocht van bitterheit. Doe murmureerde dat volc jegen Moyses ende seiden: "Wat sellen wi drinken?" Doe bat Moyses an Gode. Ende God openbaerde Moyses een hout ende hiet hem dat int water worpen. Doe Moyses dat hout int water werp, doe verloes dat water die bitterheit ende wort suet.

Figuer: Dat bitter water bediet penitencie. Mer als men daer dat hout des heiligen Cruus in worpt ende denct

[fol. 42ra]

die pijn, die passi ende die doot over die Cristus an den cruce leet ende laet hem die ter herten gaen, so wort die penitencie suet.

Doe seide God tot Moyses: "Est dat die kinder van Ysrahel mijn stemme horen ende doen rechtvaerdicheit ende sijn mijn geboden onderdaen ende doen dat Ic gebiede, op hem en sellen geen siecten comen, want Ic ben haer Heer ende haer gesontmaker."

Doe quam Moyses mit den kinder van Ysrahel in Helim. Daer vant hi 12 fonteynen mit water ende daer stonden omme 72 palmen.

Figuer: Die 12 fonteynen beduden die 12 apostolen. Ende die 72 palmen beduden die 72 discipulen. Ghelijc dat die kinder van Ysrahel van den water ende van den palmboemen gevoet worden, also worden daerna dat kerstenvolc gevoet van den apostolen ende van den discipulen van der leringen Gods.

Doe toech Moyses mit den volc van Helim ende quam bi den berch Oreb, Zynay. Ende dat was opten 15den dach in die ander maent, nadat si uut Egipten togen. Ende doe hadden die kinder van Ysrahel al haer spise opgegeten, die si uut Egipten gedragen hadden.