Noordnederlandse Historiebijbel

33 capittel

Doe seide God tot Moyses: "Gi selt gaen in dat lant, dat Ic Abraham, Ysaac ende Jacob beloeft hebbe. Ende Ic sel minen engel voir u senden, opdat hi die van Cananeen, Amorreen, Etheen, Pherezeen, Eveen ende Yebuseen uut dien lande verdrive, daer melc ende honich vloeyt. Ende dat lant sel gi besitten. Ende Ic en sel niet mit u trecken - want u volc is hartnackich -, opdat Icse niet en verstroeye in den wech." Doe dat gemeen volc dat hoerden, doe worden si screyende ende waren bedroeft.

Doe seide God tot

[fol. 49rb]

Moyses: "Segt den kinder van Ysrahel, dat si hartnackich sijn. Ende noch eens sel Ic onder hem comen. Mer versceit u van hem ende sect hem, dat si alle cyerheit van hem doen." Doe deden si alle die cyerheit van hem ende ghingen onder den berch Oreb.

Ende Moyses ghinc opten berch. Doe stont al dat volc onder den doren ende sagen na Moyses. Doe Moyses in die wolken was, doe stont al dat gemeen volc van verre ende aenbeden Gode. Doe sprac Moyses mit God also als den enen vrient mit den anderen pleecht te spreken.

Doe seide Moyses: "Here, heb ic gracie voir U gevonden, so toent mi u aensicht, opdat ic U kennen mach. Ende ansiet u volc, dat U aenbeet." Doe seide God: "Mijn aensicht die sel voer u gaen ende sel u rust geven." Doe seide Moyses: "Est dat Gi ons selve niet voer en gaet ende leet ons uut der woestinen, waerin souden wi dan weten, ic ende u volc, dat wi gracie voir uwen aensicht gevonden hadden?" Doe seide God: "Ic sel doen dat gi geseit hebt: gi hebt graci voir Mi gevonden." Doe seide Moyses: "Heer, toent mi u glori." Doe seide God: "Ic sel u alle guet openbaren, mer mijn aensicht en moech gi niet sien. Mijn aensicht en

[fol. 49va]

mach nyement sien, ende leven. Mer gi selt hier staen in een scoer van den berge. Ende mijn glorie sel verby u gaen, mer mijn aensicht en moech gi niet sien."