15 capittel
Doe sprac God tot Moyses ende seide: "Sect den kinderen van Ysrahel: Als si int lant comen dat Ic hem geven sal, dat si mijn geboden houden ende Mi offeren ende sacrificie doen, ende dat si hare loften betalen ende die hoechtiden vieren ende voert doen, als dat capittel uutwijst."
Het is gesciet doe die kinder van Ysrahel in der woestinen waren, doe vonden si daer een mens die op enen sabboth hout vergaderde. Si brochten die man voer Moyses ende voir Aaron. Ende si sloten die man in een kerker, want si en wisten niet wat daertoe te doen.
Doe seide God tot Moyses: "Die man sel men ter doot stenen." Doe geboet Moyses den man uut den volc te leden ende mit stenen te doden.
Doe seide God tot Moyses: "Seg den kinderen van Ysrahel, dat si an die somen van haren mantel naeyen offerhande van jacincten, opdat, als si die ansien, dat si gedencken der geboden Gods ende haers selves gedachten niet en volgen, ende dat hem haer ogen niet en verleden tot overspul ende tot sonden, mer dat si meer denken op die geboden Gods ende die bewaren, want Ic ben haer Here, haer God."
Auteursrechtelijk beschermd