Noordnederlandse Historiebijbel

18 capittel

Doe seide God tot Aaron: "Gi ende u kinderen ende die van den huse uwes vaders gecomen sijn, die sellen mit u dragen den last der sanctuarien. Ende gi ende u kinderen die sellen den last der priesterscap dregen. Mer uwe bruederen van dat geslacht van Levy die sellen bereet wesen u te dienen. Mer gi ende uwe kinderen die sellen dienen in Sancta sanctorum. Mer die levyten die sellen dienen in Sancta. Ende si sellen bereet wesen u te dienen tot uwen gebode ende bewaren alle vaten ende ornamenten dat totter tabarnakel hoert. Ende en laet daer nyement vreemde ingaen, opdat hi niet en sterft ende gi mit hem niet en vergaet."

Doe seide God tot Aaron: "Siet,

[fol. 62va]

Ic hebbe u gegeven alle die eerste vruchten, die men in den tabarnakel offert. Ende alle die gueden, die men daer loeft in die tabarnakel ende aldaer brenct, die sellen u wesen. Ende al daerof sel gi leven mit u huusgesin die reyn sijn. Ende onder die kinder van Ysrahel en sel gi geen guet besitten noch mit hem delen. Mer Ic sel selve u deel ende u erve wesen.

Ende die kinderen van Levy, die in den tempel dienen, die hebbe Ic gegeven die tiende van allen vruchten. Ende die en sellen anders geen guet hebben dan die tiende. Daer sellen si mede tevreden wesen ende doen voert, als dat capittel uutwijst."