Noordnederlandse Historiebijbel

31 capittel

God seide tot Moyses: "Wreect die kinder van Ysrahel over die Madyaniten. Neemt uut elc geslacht 1000 man te harnasche." Moyses dede also ende nam 12.000 man ende settede Finees, Eleazarus soen, prince over al dat volc. Ende si togen mit trompetten in dat lant ende verslogen alle die mannen ende haer coninc ende alle haer princen. Ende Balam, die propheet, die wordt daer mede verslegen. Doe namen si alle die wiven gevangen ende alle die beesten. Ende si namen alle die cleynoden ende juweelen die si dregen ende voeren mochten. Ende die steden, dorpen ende castelen die verbarnden

[fol. 67rb]

si. Doe brochten si den roef van menschen ende van beesten ende gouden ende sulveren vaten ende ander guet voer Moyses ende voer Eleazarus.

Ende si ghingen den volc jegen uut die tabarnaculen. Ende doe Moyses sach dat si die wiven ende die kinderen brochten, doe was hi toornich ende seide tot den princen, die heren, die dat volc brochten: "Waerom brenct gi die wiven ende laetse leven? Weet gi niet wat Balam den wiven riet ende hoedat die kinder van Ysrahel daerom geplaget worden? Daerom, slaet alle die wiven doot die geen maechden en sijn, ende slaet alle die knechtgins doot, mer laet die maechden leven." Ende dat wort vlus gedaen van dengenen die in die strijt waren.

Doe seide Moyses: "Hoert dat gebot Gods: Al dat guet gout, sulver, coper, yser, tyn ende loet dat daer geroeft is, dat sel men in die tabarnakel offeren." Ende dat wort gedaen.

Doe geboot God Moyses dat men dat ander guet, menschen ende beesten ende ander juweelen, gelijc soude deelen dengenen die in den strijt geweest hadden. Moyses dede also. Ende voert dede hi, als dat capittel uutwijst.