Noordnederlandse Historiebijbel

27 capittel

Doe begonde Moyses den volc te seggen: "Bewaert alle die geboden die ic u huden geseit hebbe. Ende als gi over die Jordaen gaet int lant dat u God geven sal, so neemt stenen uut der Jordanen ende recht die op ende maect daer Gode een outaer of. Ende doet daer Gode sacrifici

[fol. 77rb]

op ende offert daer die offerhande des vreden. Ende scrijft op die stenen alle die woerden der wet, opdat gise claer bekennen moecht."

Doe seide Moyses ende die priester tot al die kinder van Ysrahel: "Hoert ende verstaet die woerden Gods. Hout sijn geboden ende weest rechtvaerdich ende doet dat ic u gebiede. Dese sellen staen opten berch Garusim om God, den Heer, te gebenedien: Symeon, Levy, Judas, Ysachar, Joseph, Benyamin. Ende daerjegen sellen staen die ander geslachten opten berch Ebal: Ruben, Gad, Azer, Zabulon, Dan ende Neptalim."

Ende die levyten sellen voirseggen tot die kinder van Ysrahel mit luder stemmen: "Vermaledijt si den mensche die beelden maect mit gieten ende mit snyden van hout of van steen, ende men die in heymelike steden set ende die anbeet voir God." Doe andwoerde al dat volc ende seide: "Amen." "Vermaledijt sij hi die vader ende moeder niet en eert." Doe seide al dat volc: "Amen." "Vermaledijt si die mens die een mens brenct tot enen eynde." Doe seide al dat volc: "Amen." Vermaledijt si hi die een blint mens doet dwalen in den wege." Doe seide al dat volc: "Amen." "Vermaledijt

[fol. 77va]

si hi die dat recht verkeert van vreemden, van weduwen ende van wesen." Doe seide al dat volc: "Amen." "Vermaledijt is hi die slaept bi sijns vaders wijf." Doe seide dat volc: "Amen." "Vermaledijt is hi die misdoet mitten beesten." Doe seide dat volc: "Amen." "Vermaledijt is hi die bi sijn suster slaept, eens vaders ende eens moeders kint." Doe seide al dat volc: "Amen." "Vermaledijt is hi die slaept bi sinen swager." Doe seide al dat volc: "Amen." "Vermaledijt is hi die slaept bi sijns evenmenschen wijf." Doe seide al dat volc: "Amen." "Vermaledijt is hi die sinen evenmensche verslaet." Doe seide al dat volc: "Amen." "Vermaledijt is hi die giften nimt ende stort dat onnoesel bloet." Doe seide al dat volc: "Amen." "Vermaledijt is hi die niet en blijft onder die wet ende volbrenct die geboden mit die wercken." Doe seide al dat volc: "Amen."