Noordnederlandse Historiebijbel

3 capittel

Doe die kinder van Ysrahel dat lant besaten, doe woenden onder hem Cananeen, Etheen, Yebuseen, Amorreen, Phereseen, Eveen. Ende si namen der kinder van Ysrahel haer dochteren te wive. Ende die heydenen namen der joden dochteren te wive. Ende alle aenbeden si affgoden ende dienden Baal ende Astraoth. Doe was God op die van Ysrahel vertoornt ende gafse onder den coninc van Mesopothanie, die genoemt was Cusan. Ende die mosten si dienen ende waren hem onderdanich 8 jaer lanc. Doe riepen die kinder van Ysrahel an God ende baden genade.

[fol. 93ra]

Doe scickede hem God enen verlosser diese vriede van den coninc Cusan ende was genoemt Othoniel, Calefs joncste brueder. Die geest Gods was in hem ende hi berechtede die van Ysrahel. Ende Othoniel die toech mit die kinder van Ysrahel te stride jegen Cusan. Ende God gaf hem Cusan in sinen handen mit al sijn volc. Ende si verslogense ende verlosten die van Ysrahel. Ende doe bleef dat lant van Ysrahel in rusten 40 jaer lanc. Ende doe Othoniel doot was, doe verdwaelden die kinder van Ysrahel van God ende anbeden afgoden tegen die wet.

Doe die kinder van Ysrahel sondichden in dat aenschijn Gods, doe stercte God jegen hem Eglon, den coninc van Moab. Ende die van Amon ende van Amelech die holpen hem ende si verslogen voel volcx van Ysrahel. Ende hi besat Yerico ende maecte daer een vaste stede. Ende die van Ysrahel die waren den coninc van Moab onderdanich 18 jaer lanc.

Doe riepen die kinder van Ysrahel an God genade ende si kenden dat si misdaen hadden. Doe settede hem God enen rechter, genoemt Ayoth, die was alsoe sterc in sijn lufterhant als in sijn rechterhant. Hi dede maken een cort swaert ende hinc dat onder sijn mantel an die rechterside. Ende die kinder van Ysrahel gaven hem giften Eglon, den coninc van Moab, te dragen. Ende

[fol. 93rb]

Eglon hadde sijn afgoden geeert opten berch Galgala ende was gaen sitten in sijn stoel der mogentheit in sijnre salen. Ende Eglon die was seer vet. Doe quam Ayoth tot hem ende gaf hem die giften ende seide: "Here coninc, ic heb wat heymelics mit u te spreken." Doe geboet die coninc hem allen te swigen ende ghinc mit Ayoth in een camer. Ende doe toech Ayoth dat swaert mit der lufterhant ende stact den coninc doer sinen vetten buuc ende doer sijn darmen, sodat hi nederviel ende bleef doot. Ende Ayoth die liet dat swaert in die wonden steken ende ghinc heymelic uut den camer ende sloetse weder toe. Daerna quamen des conincs knechten ende vonden des conincs camer gesloten ende ghingen weder wanderen. Ten lesten doe deden si die camer op ende vonden haer coninc doot leggen. Ende Ayoth die quam in Effraym ende openbaerde den kinder van Ysrahel wat hi gedaen hadde, ende seide tot hem: "Volcht mi na. God sel ons die van Moab in onsen handen geven. Doe volchden die van Ysrahel Ayoth na. Ende si besetteden die Jordaen daer die van Moab overliden souden ende die van Ysrahel verslogen van die Moabiten wel 10.000 mannen. Ende doe bleef dat lant van Ysrahel in rusten 80

[fol. 93va]

jaer lanc.

Daerna quamen die Philisteen ende wouden die van Ysrahel bestriden. Ende daer toech Samger tegen ende versloech 600 mannen mit enen kuuter van enen ploech. Ende hi bescermde die van Ysrahel, mer hi en regierde mer een jaer.