Noordnederlandse Historiebijbel

Hier beghint dat Ander boec der Coningen

Dat eerste capittel

Het is gesciet doe Saul doot was, doe was David in Syceleg. Opten dorden dach doe quam daer een mensche uut den here van Ysrahel voir David. Sijn cleder hadde hi gescoert ende hadde assche op sijn hoeft gestroeyt ende viel voir David op sine knyen. Doe seide David tot hem: "Waen coem gi?" Die knecht seide: "Ic ben ontlopen uut den heer van Ysrahel." Doe seide David: "Segt mi, wat is daer gesciet?" Die knecht seide: "Dat volc van Ysrahel is gevlogen ende veel verslegen. Ende Saul ende Jonathas ende sijn ander kinder sijn doot." Doe seide David: "Hoe coem gi dat te weten dat Saul ende Jonathas ende sijn ander kinder doot sijn?" Doe seide die knecht: "Ic quam om een saec opten berch van Gelboe. Ende Saul stont ende leende op sijn speer. Ende sijn vianden mit wagenen ende paerden quamen bi hem. Doe sach hi omme ende riep mi tot hem. Doe vraechde hi mi van waen ic was. Doe seide ic: van die van Amelech. Doe seide hi: `Com bi mi ende slach

[fol. 130rb]

mi doot, want anxt ende vresen die hebben mi ombevanghen.' Ende doe quam ic bi hem ende sloech hem doot, want ic sach dat hi niet leven en mocht. Ende doe nam ic sijn croen van sinen hoefde ende sijn hecsel. Ende ic heb u dat gebrocht als voir mijn heer."

Doe scoerde David sijn cleder ende alle die mannen die bi hem waren. Ende si screyden ende vasteden om Saul ende sijn kinderen die daer verslegen waren ende voel volcs van Ysrahel. Doe seide David tot den knecht die die boetscap brocht: "Waen sie gi?" Die knecht seide: "Ic ben een mans soen van Amelech." Doe seide David: "Waerom en ontsage gi u niet dat gi den gewiden, gesalfden coninc sout dootslaen?" Doe riep David enen van sinen knechten ende seide: "Ganc ende verslaet dien knecht." Ende die knecht ghinc ende sloech den knecht doot.

Doe bescreide David Saul ende Jonathas. Ende hi geboet al dat joetsche gheslacht dat si Saul ende dat ander volc bescreyen souden, als in dat Boec des Rechters gescreven stont. Doe seide David: "Du burch van Gelboe, noch dou noch regen en moet op u comen, noch gene vruchten en moeten op u wassen, want Saul mit die stercste van Ysra\hel

[fol. 130va]

daerop verslegen is. Saul ende Jonathas waren snel als die aern ende sterc als die leeu." Doe seide David: "O, brueder Jonathas, gelijc dat die moeder haer enich kint minde, also minde ic u. Mi rouwet dat gi daer verslegen sijt."