Noordnederlandse Historiebijbel

8 capittel

Daerna doe toech David ende versloech die Filisteen ende settede op hem tribuyt, dat si hem jaerlix mosten geven. Doe verwan David die Moabiten ende settese oec tot enen tribuyt. Doe versloech David Adadeser, den coninc van Soba, mit voel wagenen,

[fol. 134va]

paerden ende voetgangers ende settede dat lant te tribuyt. Ende doe toech David in Syrien ende versloech daer 22.000 mannen ende settede dat lant te tribuyt.

Ende David die brocht uut dien lande harnasch gout, sulver ende coper, dat Salomon daerna besichde an den tempel. Doe die coninc van Emath verhoerde dat coninc David Adadeser verslegen hadde ende sijn lant tot tribuyt geset hadde, doe sende Thou, die coninc, Joram, sinen soen, tot coninc David ende ontboet hem gruet ende geerde vrede mit hem te hebben ende bedancte hem seer, omdat hi Adadeser, sijn viant, verslegen hadde. Ende hi vercreech vrientscap mit coninc David. Doe toech coninc David in Ydumea ende versloech daer voel volcs ende settede dat lant onder rechters om tribuyt. Al dat gout ende gouden vaten, silveren vaten ende coperen die offerde David in die tabarnakel voir Gode. Ende dat guet wort al vergadert tot den tempel te maken. Ende David sette van sinen gesin in die verwonnen landen om te regieren ende te rechten.

Doe dancte David ende lovede Gode ende maecte desen psalm: Dyligam te, Domine, fortitudo mea; Dominus firmamentum meum

[fol. 134vb]

et refugium meum et liberator meus. Here, ic sel U minnen in mine stercheit; die Here is mijn vestinghe, mijn toeverlaet ende mijn verlosser. Ende dien psalm voert uut.