Noordnederlandse Historiebijbel

9 capittel

Het is gesciet doe Salomon den tempel volmaect hadde ende sijn husinge daer hi in woende, doe openbaerde hem God anderwerf, gelijc dat Hi hem eerst openbaerde in Gabaon. Ende God seide tot Salomon: "Ic hebbe u begheert ende u gebet gehoert dat gi voer Mi gedaen hebt. Ic hebbe dat huys geheilicht dat gi in minen naem gemaect hebt ende Ic sel minen naem daerin setten in der ewicheit. Ende mijn oghen ende mijn herte sel daer wesen tot alre tijt. Ende ist dat gi voir Mi wandert in minen wech in simpelheit uwer herten, als David, uwen vader, dede, ende doet al dat Ic u geboden hebbe ende hout die geboden ende

[fol. 159ra]

die wet ende die rechvaerdicheit, so sel die macht uwes rijcs op Ysrahel bliven in der ewicheit, ghelijc dat Ic tot David, uwen vader, seide: houden si mijn geboden, Ic en sel die macht niet van hem halen. Mer ist dat gi ende u volc van Mi keert ende in minen wech niet en blijft ende mijn geboden niet en hout ende die wet niet en bewaert, mer dient gi afgoden ende aenbedet die, so sel Ic die van Ysrahel uut desen lande verdriven dat Ic hem gegeven hebbe. Ende den tempel die Ic in minen naem geheilicht hebbe, die sel Ic van minen aensicht worpen, ende al die van Ysrahel verdriven tot enen exempel ende leer. Alle dengenen die daer verbygaen, die sellen vervaert wesen ende seggen: `Waerom heeft God dit lant aldus verderft ende dit costelic ende wonderlike werc tenietgemaect?' So sel men andwoerden: `Omdat si haren God ende haren Here gelaten hebben, diese uut Egipten lede ende haer voirvaders in dit lant settede, ende si dienen ende aenbeden afgoden, daerom heeft God alle quaet op hem gebrocht ende heeft dat volc, dat lant ende den tempel gedestrueert."

Doe Salomon den tempel ende sijn woninghe gemaect hadde daer hi in woende, doe sende hem Hyram, die coninc van Tyren, cederhout noch meer mede te tymmeren. Ende doe sende Salomon die scepen mit sinen knechten ende

[fol. 159rb]

des conincs knechten van Tyren om gout ende sulver in anderen eylanden, ende om ander cyerheit mede te tymmeren in dat eylant Ofyr, in Asien, in Cylicien. Ende si brochten gout, silver ende gesteent ende welrukende hout van tymananden. Daer dede Salomon in den tempel ende in sijn sael sittenen of maken, omdattet wel roec. Oec so brochten si scheminckelen, paeuwen, tanden van olyfanten ende oec menich instrument van musijc ende ander wonderlicheit die in Ysrahel niet en was.

Doe bemuerde Salomon al Jherusalem om mit 3 mueren. Eerst leide hi een muer om den tempel. Ende daer woenden binnen die priesteren ende levyten die in den tempel dienden.

Ende David die hadde geordiniert sevenrehande dienres die dagelics in den tempel dienden elc haren tijt van den leviten. Die eerste ende die nederste dat waren janytores, doerwachters; die hadden die slotelen te bewaren van den tempel ende van dat daerin was. Ende si keerden die honden ende die heyden uut den tempel ende alle diegene diet niet geoerloft en was in te gaen. Dat ander waren lectores; die songen die prophecien in den tempel. Dat dorde wa\ren

[fol. 159va]

exorcisten, die die menschen belasen ende die duvelen daeruut jaechden ende beswoeren ende verdrevense. Dat vierde waren acolyti; die ontstaken die lampen, die lantaernen ende dat licht des tempels ende besorchden al dat daertoe diende. Dat vijfte waren subdyaken; die ordineerden die ornamenten ende die gewide vaten die men in den tempel besichde. Dat seste waren diaken; die ordineerden die sacrificien. Ende si setteden dat broet ende oly ende ander cruyt op die tafel in Sancta sanctorum. Dat sevende waren priesteren; die consacreerden ende heilichden als dat gheordineert was.

Ende coninc David die hadde geordiniert 24 priesteren die elc een weec dienden in Sancta sanctorum. Ende binnen dier tijt en ghingen si daer niet uut, nacht noch dach. Ende daerom wast geordiniert van Gode dat an ephod bellen hangen souden: als die priesteren den dienste deden ende als die bellen cloncken, dat si dan medebaden. Ende alst tijt was den dienst te doen ende men die bellen niet en hoerde, so ghinc daer een van den oversten priesteren in Sancta sanctorum ende besach wat den priester deerde. Ende die mannen waren voir in den tempel buten

[fol. 159vb]

Sancta sanctorum, die maechden van den mannen voir, die we waren daeran ende die geechte daeran, ende des gelijcs die maechden van den vrouwen, daeran die weduwen, ende daeran die gehilicte vrouwen. Ende soe wie in openbaer sonden leefde, die en quamen in den tempel niet, mer die bleven buten voir den tempel in dat poertael.

Doe leide Salomon noch een muer alom binnen Jherusalem. Ende daerbinnen woenden die princen ende die heren ende die rijcheit van der stede. Ende dat was dat dorden deel, daer Lazarus heer of was in sijnre tijt, Magdalenen brueder, als over die joden.

Ende noch leide Salomon een muer buten om Jherusalem. Ende daer woenden binnen die ambochtsluden ende alle die neringe deden ende die meenteluden. Ende daerbinnen an die muer in een straet, hiet Mello, daer stont Davids casteel ende sijn woninge. Ende in dieselve woninghe at Jhesus sijn Laetste Avontmael mit sinen apostolen. Ende voir Davids casteel maecte Salomon een wonderlike stercke muer. Ende op dat casteel so leyde Salomon sijn neve Jeroboam, omdat hi dat bewaren soude.

Daer lach een stede in der woestinen ende hiete Gazer, ende daer woenden in altesamen Cananeen. Doe quam

[fol. 160ra]

Pharo, die coninc van Egipten, ende wan die stede ende versloech dat volc ende verbarnde die stede ende gafse doe sijnre dochter, Salomons wijf. Ende doe Salomon Jherusalem vast bemuert hadde, doe tymmerde hi die steden ende bemuertse die in der woestinen lagen, als Gazer, Betheron, Balath ende Palmyram. Ende die dorpen daer men sijn paerden ende sijn wagenen hielt, bemuerde hi. Ende al dat volc dat onder hem woende van Amorreen, van Etheen, Fereseen, Eveen, Yebuseen, die settede Salomon, dat si alle jaerlics tribuyt mosten geven ende dienen hem mit haren arbeit. Ende die van Ysrahel waren 500 prinsen ende vijftich, die alle dienaren onder hem hadden die in sinen hove dienden.

Doe toech Salomons coninghinne, des conincs dochter van Egipten, uut Jherusalem in dat huys dat Salomon haer gemaect hadde.

Ende Salomon offerde driewerf des jaers in den tempel grote giften.

Ende die coninc Hyram van Tyren die sende scepen mit sinen knechten in Ofyr, in een eylant bi dat Rode Meer. Ende si brochten vandaen 500 ende 20 talenten gouts. Ende silvers sonder getal dat brochten si al Salomon mede te tymmeren. Op die tijt was daer also voel sulvers in Jherusalem, dat tot voel steden die sittenen in die husen ende voir die husen mit sulver gemaect ende bedect waren ende seer versiert.