Noordnederlandse Historiebijbel

14 capittel

Doe Amasyas 25 jaer out was, doe wort hi coninc van Judeen ende regneerde 29 jaer in Jherusalem. Ende sijn moeder hietede Joaden ende was van Jherusalem. Hi hielt eens deels die geboden mer niet volmaectelic. Doe hi in dat conincrijc vast was, doe sloech hi die twee knechten doot die sinen vader verslogen, mer haer kinderen en versloech hi niet, als Moyses in die wet bescreven hadde ende God geboet, daer Hi seide: "Gi en selt die vader niet doden voir die kinderen, noch oec die kinderen niet doden voir den vader. Mer een ygelic sel voer sijns selfs sonden sterven."

Doe vergaderde Amasyas sijn volc uut Judeen ende van Benyamin, van 20 jaren ende daerboven. Ende hi hadde 30.000 jonge mannen die cloec waren te striden. Ende hi huerde soudenyers uut Ysrahel, 100.000 stercke mannen, om 100 talenten sulvers. Doe quam daer een man Gods tot Amasias ende seide: "O coninc, en laet die van Ysrahel niet mit u te stride varen, want God en is mit hem niet. Waen gi dat die verwinninge leit in die stercheit des volcs?

[fol. 186rb]

Neen, God ist die den sege gift." Doe seide Amasias totten man Gods: "Hoe sel ic doen mit die 100 talenten sulvers die ic den ridderen van Ysrahel gegeven hebbe?" Doe seide die man Gods: "God die heeft guets genoech, dat Hi u wel voel meer mach verlenen." Doe sceide Amasias dat volc van Ysrahel uut sinen volc ende hietse weder thuys trecken. Doe togen die van Ysrahel thuys. Ende si waren toornich op die van Juda.

Amasias die nam sijn volc ende betrouwede hem daerop ende toech daermede in den Dael van den Bussche ende versloech daer 10.000 man van Seyr. Ende Amasias die versloech die van Ydumeen ende nam haer afgoden ende beelden mit hem in Judeen ende anbeedse. Ende doe wort God toornich op Amasias ende sende tot hem een propheet die seide: "Waerom anbeet gi die afgoden die haer volc van uwen handen niet en mochten verlossen?" Doe seide Amasias: "Sie gi des conincs raet? Swijcht, so en dode ic u niet." Doe seide die propheet: "Ic weet dat God gedocht heeft u te doden, omdat gi die grote sonden doet. Ende gi versmeet minen raet." Doe dede Amasias den propheet doden.

Ende Amasias, die coninc van Juda, die sende sijn boden tot Joas, den coninc van Ysrahel, ende

[fol. 186va]

seiden: "Coemt ende doet den coninc van Juda onderdanicheit ende vrientscap." Doe sende Joas, die coninc van Ysrahel, boden tot Amasias, den coninc van Juda, die seiden: "Die stekel die is in Lybaen op den berch, die sent totten sederboem die opten berch Lybaen is ende seit: `Geeft u dochter minen soen.' Ende siet, die beesten die in den bussche van Lybaen sijn, die ghingen ende vertraden die stekelen. Gi hebt geseit gi hebt die van Ydumea verslegen. Ende daerom is u hert verheven in hovaerdien. Blijft in u huys mit rusten, opdat gi ende al Judeen niet en snovelt." Mer Amasias en woude den raet Gods niet horen. Daerom gaf hem God in die handen sijnre vianden, omdat hi afgoden anbede. Doe toech die coninc van Ysrahel Joas jegen Amasias te stride. Ende Amasyas, die coninc van Juda, die weec in Bethsames. Ende Joas vervolchde hem ende vinc hem ende woude hem doden. Mer Amasias loefde Joas, den coninc, in Jherusalem te brengen, als hi dede. Doe Joas, die coninc van Ysrahel, in Jherusalem was, doe brac hi die muer van Jherusalem van der Effraymse Poort totter Poorten van den Hoeck toe, 400 cubitus verre. Ende al dat gout ende dat sulver dat in den tempel Gods was, dat nam hi mit hem, ende oec

[fol. 186vb]

al den scat ende cyerheit des conincs. Ende oec nam hi mit hem al die edelste kinderen van Jherusalem ende besloetse in Samarien. Ende Amasias, die coninc van Juda, die leefde 15 jaer na Joas, die coninc van Ysrahel.

Die woerden ende wercken die Joas, die coninc van Ysrahel, dede, die en sijn in der Coningen Boec niet bescreven. Ende doe Joas sterf, doe wort hi begraven in Samarien. Ende Jeroboam, sijn soen, die regneerde na hem. Ende die van Juda ende van Jherusalem die swoeren jegen Amasyas. Ende doe weec Amasias in Lachis. Ende dat volc toech hem na ende verslogen hem aldaer. Ende si brochten hem wederomme op een paert tot Jherusalem. Ende aldaer wort hi begraven.

Ende dat ghemeen volc die namen Ozias, sijn soen, die 16 jaer out was ende maecte hem coninc.

Van Jeroboam, den coninc van Ysrahel

Jheroboam was coninc van Ysrahel 41 jaer ende woende in Samarien. Ende hi volchde des eersten Jeroboams leven na in sonden. Ende hi anbede afgoden. Ende die van Ysrahel waren bedwongen van die van Syrien, sodat si swaerlic belast waren, want waer mense creech, men leidse in den kercker. Ende daer en was nyement die hem halp. Doe gaf God Jeroboam macht mit die van Ysrahel, dat si al dat lant wonnen van Emath totter Zee in der woestijn, als Jonas, die propheet, voirsproken hadde dat men Syryen soude winnen. Ende om de\se

[fol. 187ra]

sege willen die Jeroboam hadde, so verhief hi hem in hovaerdien. Ende God sende Amos, den propheet, tot hem die seide: "Dit seit God, die Heer: `Ic sel Jeroboams huys mit den swaerde doen verslaen. Ende dat eynde van Ysrahel is nakende.'" Ende Jeroboam hiet den propheet swigen, mer die propheet sprac die woerden Gods. Doe dede Jeroboam den propheet doden. Ende Jeroboams woerden ende werken ende hoe dat hi street, dat en is in der Coninghen Boec van Ysrahel niet bescreven. Daerna doe sterf Jeroboam ende wort begraven in Samarien. Ende Sacharias, sijn soen, die regneerde na hem.