Noordnederlandse Historiebijbel

[13]

Ende Thobias seide: "Here, Du biste groet ewelic. Tot allen tiden duert dijn conincrijc, want Gi slaet ende maect gesont. Gi doot ende Gi maect levende. Ende nyement en is die u hant mach ontvlien. Beliet den Heer, gi kinderen van Ysrahel, ende loeft Hem in der jegenwoerdicheit des ongelovichs volcs. Want daerom hevet Hi ons gestroeyt onder dat volc dat Hem niet en kennet, omdat gi sinen wonderen selt voertkondigen ende hem doen weten dat geen almachtich God en is dan Hi. Om onser sonden so heeft Hi ons gecastiet. Ende om sijn ontfermherticheit so sel Hi ons gesont maken. Daerom, ansiet wat Hi ons gedaen heeft ende loeft Hem mit wonder ende mit vresen. Ende verhoget den coninc van al der werelt in uwen werken. Ende ic sel Hem belien in den lande mijnre gevangenisse, want in dat sondige volc heeft Hi sijn moghentheit getoent. Daerom bekeert u, gi sondaren, ende sijt gerechtich voer Gode. Ende hopet dat Hi sijn guedertierenheit u sel bewisen. Mijn siel sel in Hem verbliden. Ghebenedijt den Heer, gi alle die van Hem vercoren sijt. Maect dagen van vroechden ende loeft Jherusalem, die stat Gods. Die Heer heeft u gecastiet in die wercken van uwen handen. Lovet God in den guede ende gebenedijt Hem, die God is alre werelden, dat Hi weder in u

[fol. 205ra]

moet tymmeren sinen tabarnakel ende daertoe wederropen alle die gevangen ende dattu di mogeste vervroechden in ewigen tiden."

Nu spreect Thobias voirt uut den geest der prophecien van den oversten Jherusalem, van der hemelscher stat: "O hemelsche Jherusalem, mit glinsterende licht selstu blincken. Ende alle die lantscappen van aertrijc die sellen di anbeden. Dat heidensche geslacht sel van verre tot di comen, ende sellen mit giften den Here anbeden in di, ende sellen dijn lant voir heilich houden. Ende den groten naem sellen si anropen in di. Ende vermaledijt sellen dine versmaders wesen. Ende si sellen verdoemt wesen, die di blasphemeren. Ghebenedijt sellen si sijn, die di sellen tymmeren. Ende du selste di vervroechden in dinen kinderen, want si sellen gebenedijt wesen ende tot Gode vergadert worden. Salich sijn si alle, die di minnen ende die hem verbliden in dijn vrede. Mijn siel gebenedijt den Here, want Jherusalem, sijn stat, heeft onse Here God verlost van alle haer liden. Salich sel ic sijn, mach dat afterlaten van minen sade sien die claerheit Gods.

Die poerten van Jherusalem die sellen van saphiren ende van smaragden getymmert worden ende van costeliken gesteenten. Alle hare mueren ommeganc

[fol. 205rb]

sijn stenen, claer lichtende ende reyn. Alle haer straten sijn gepaveyt mit goude. Ende in al haer stegen sel gesongen worden: `Alleluya'. Ghebenedijt si die Here, diese daertoe hevet verheven ende vercoren tot sinen rijc ende sijn heerlicheit te hebben over haer van ewen tot ewen. Amen."