Noordnederlandse Historiebijbel

Van Antipater, die rechter van Jherusalem, Herodes Ascoloniten vader

[Tekst]

Antipater was rechter in Jherusalem. Ende Yrcaen was biscop. Ende Anthonius ende Gabinus waren princen van Romen. Die gaven Antipater een wijf des conincs dochter van Arabien, die Cypris hiet. Daer wan hi 4 sonen an ende een dochter. Die outste soen hiet Fazelus. Die ander hiet Herodes Ascolonita. Die dorde hiet Josephus. Die vierde hiet Feroas ende die dochter hiet Saloma. Daerna starf Gabinus.

Doe was een rechter in Cyrien gesent, genoemt Crassus. Doe die Crassus te Jherusalem quam ende hi die cyerheit in den tempel sach ende die gouden vaten, doe nam hi al dat gout uut den tempel. Ende die Percen en wouden die Romeynen niet onderdaen wesen. Daer toech die Crassus om hem te bedwingen. Ende daer wort hi gevangen. Ende daer wort hem gesmouten gout in sijn keel gegoten; also sterf hi.

Daerna wort

[fol. 243rb]

een rechter in Cyrien gesent, die hiet Cassius. Ende die wrocht al bi Antipaters raet.

In die tijt so was die werringe onder die Romeynen onderlinge, want die een woude Pompeyus hebben tot enen heer ende die ander woude Julius hebben tot enen heer. Die twee streden jegen malcander, elc mitten sinen. Ende Pompeyus wort verwonnen. Ende hi quam in Egipten ende aldaer wort hi vermoert.