Oud-Vlaemsche liederen en andere gedichten der XIVe en XVe eeuwen

LVI. [Scinc her den wijn]

Scinc her den wijn;
Gheselle mijn,
Wi willen vroilic leven;
Het mach sulc zijn,
Noch up den Rijn,
Die ons gheluc mach geven,
Al moeten wi nu sneven.

Wat saelt ghetruert,
De sulc bezuert,
Een ander moet bezoeten;
Wat mi ghebuert
Ic willecuert.
God saelt noch tjaren boeten,
Dat wi nu trueren moeten.

In vruechden vro
Sine wi also,
Wi willens ons verbliden.
Wine achtens jo
Een averstroo;
Die ons daer om beniden
God geve hem al ons liden.

[p. 123]

 

God geve hem heil

 

Met vruechden geil,

 

Wie metten vrauwen hoven;

 

Al heift een veil

 

Den wint in tzeil.

 

Hi mach hem wel beloven

 

Es hi des nijts te boven.

 

 

 

Wel op, wel aen,

 

Laet niden staen,

 

Ende leven wi metter eere;

 

Met niders gaen,

 

Onnere ontfaen;

 

Van haren bozen kere

 

Elc man hem hoeden lere.