Pseudo-Bonaventura-Ludolfiaanse leven van Jesus

Te vespertijt. Dat .xxxiiij. capittel

Te vesper tijt sulste dencken mit droever screyender herten, hoe die moeder ons Heren ende die ander vier hem setten weder neder biden cruce ende niet en wisten wat si doen souden, want si dat lichaem niet of ghedoen en konden ende begraven, omdat si die craft niet en hadden noch die instrumenten mede of te doen. Ende si en dorsten niet en wech gaen ende onsen Heer so laten ende si en mochten niet langhe daer bliven, want die nacht nakede. Sich hoe zeer si beghanghen sijn. Hier en binnen quam Josep van Arimatien, die rijc was ende rechtvaerdich ende een mede vanden hove die gheen consent totten doot ons Heren ghegheven en hadde, ende brochte instrumente mit hem, daer hi dat lichaem mede of doen mochte vanden cruce. Ende mit hem quam Nycodemus ende brochte omtrent hondert pont mirren ende aloes om hem mede te begraven. Ende als si quamen inder stat, bogheden si hoer knien ende beden onsen Heer aen. Ende si worden waerdelike ontfanghen van Onser Vrouwen ende vanden anderen, die mit haer waren, ende bereiden hem dat lichaem of te doen. Doe

[fol. 162r]

stont Maria mit opgherechten armen ende als si onsen Heer reyken mochte, so leide si sijn hande ende sijn hovet nederhanghende op haer droeve borst ende omhelsede se ende cussede se ende en mochte daer niet of versaet warden. Ende als dat lichaem neder ghedaen was ter aerden, nam onse Vrouwe dat hoeft mitten schouderen in horen schoet ende Maria Magdalena die voete, tot wilken si so veel gracie verdiende. Die ander stonden daer bi ende si maecten alle een groet bescreyen over hem, want si bescreiden hem alle als enen een gheboren soen mit groter bitterheden. Lieve mensche, coem oec du mit devoten voertganghe ende mit gheesteliken toe ganghe om dinen Heer of te doen vanden cruce ende hem te bescreyen mit sijnre ghebenedider moeder ende mit den anderen die daer waren ende om hem te begraven ende anders te doen dat men daer dede.

Na eenre corter tijt, als die nacht begonste te naken, bat Joseph onser Vrouwe, dat si henghen woude, dat men dat lichaem bewonde mitten linnen laken ende begroeven. Ende si was daer teghen ende seide: "Mijn lieve vriende, en nemet mi also vroe mijn lieve kint niet of; begraeft mi mit hem". Si screyede mit onverdrachliken tranen ende

[fol. 162v]

maecte mit horen tranen nat dat aensicht ende dat dode lichaem hoers kints ende oec den sarc, daer men seghet, dat noch hoer tranen in staen. Si dwoech oec ende droghede sijn bloedighe wonden ende kussede si ende sijn aensicht altemael. Si sach die wonden aen sijns lichaems, ende sijn aensicht ende sijn hoeft ende die punten der doernen in sijn hoeft ende dat uutrecken sijns haers uut sinen baerde ende sijn aensicht mismaect mit spekel ende mit bloede. Ende van dit aen te sien ende van screyen en mocht si niet versadet worden. Magdalena die die voete ons Heren tot anderen tiden mit tranen des rouwen hoerre sonden nat ghemaket had, dwoech se nu veel meer mitten water der tranen van rouwen ende van mede doghen. Si aensach die voete also ghewont ende doer boert, verdroghet ende bloedich, ende screyede bitterlike. Ende des ghelijcs alle die ander screyeden so seer, dat si van rouwen seer schenen ghebreken.