Refereynen ende liedekens

[fol. A2r]

§ Copije der Priuilegien byden Conincklijcker Maiesteyt in den Secreten Rade.

OP de Supplicatie ouerghegheuen inden Secreten Raedt s'Conincx van weghen Michiel van Hamont ghesworen Drucker, ende Boeckvercooper, woonende binnen deser Stadt van Bruessele, versoeckende oorloff ende consente om te moghen printen, vercoopen ende distribueren ouer alle dese Landen van herwaertsouere sekere Refereynen ende Liedekens van diuersche Rhetoricienen wt Brabant, Ulaendren, Hollandt, ende Zeelandt, ghelesen ende ghesonghen opde Corenbloeme Camere binnen der voorseydet Stadt van Bruessele, op haer Iaerlicxse Prins-Feeste vanden voorleden Somere, Op de Uraghe, Wat dat de Landen can houden in Rusten? Ende de Liedekens, Als Dauid speelde op sijnder Herpen, verdrijuende Sauls boosen Woet. zeer lustich om lesen ende singhen. De welcke hy tsijnen grooten coste heeft vercreghen, ende doen visiteren (hoe wel die eerst ghevisiteert en gheapprobbeert waren by diuersche Pastoirs) by Heeren ende Meesteren Laureys Metsius Plebaen van Sinte Goedelen Kercke, Uersoeckende oick om te bet moghen recouvreren sijne Costen, dat gheinterdiceert zij alle anderen Printers die niet nae te printen oft elders gheprint niet te vercoopen binnen Ses Iaren naestcommende, sonder sijne wille ende consent: ende

[fol. A2v]

hem daer toe verleenen behoorlijcke Acte. Sijne Majesteyt, Nae dien dat by Uisitatie daeraf ghedaen vanden voorseyde Refereynen ende Liedekens (als voren) die selue beuonden zijn gheweest gheen Erreur noch dwalinghen teghens onsen Kersten Ghelooue inhoudende, Heeft den voorseyden Michiel van Hamont Suppliant gheconsenteert ende ghepermitteert, Consenteert ende permitteert, hem gheuende oorlof ende consent midts desen de voorseyde Refereynen ende Liedekens, in Nombre van Tseuentich, te moghen printen, ter vente stellen ende distribueren alomme in dese Landen van Herwaertsouere, Sonder daer omme teghens sijne Majesteyt eenich sins te misdoene. Ende wt meerder Gratie heeft deselue sijne Ma. verboden ende geinterdiceert, verbiedt ende interdiceert allen anderen Printers ende Librairiers van dese sijne Maiest. Landen, de voorseyde Refereynen ende Liedekens niet naer te printen, oft elders ghedruckt niet te vercoopen, sonder des Suppliants wille, wete, oft consente, binnen den tijt van Uier Iaren naestcommende, Op Peyne van conficatie vande selue Refereynen ende Liedekens, tot proffijte vanden Suppliant, ende Boete van Ses Carolus guldens, tot proustiite van sijne Maiesteyt. Ghedaen te Bruessele, den .xviii. dach van Februario, Anno .xv^c. ende Tweentsestich. Onderteeckent,

J. dela Torre.