Refereynen ende liedekens

§ Alle Rhetoricienen, int constich verclaren, Wenscht t'Corenbloemken Salicheyt, en Welvaren.

Edel Artisten // Constighe Poëten,
Mercurialisten // volder Secreten,
Alle die in dit Stuck hebben ghelaboreert,
En als Mineruisten // hebt laten weten
Rhetorices Gheest, die t'Herte consoleert:
Uan t'Corenbloemken wort ghy lieflijck ghelaudeert,
Want ghy uwen Arbeyt niet en hebt ghespaert

[fol. A6v]

 

In haer Feeste: maer hebt lustich ghecomponeert

 

De Uraghe, en met Solutie verclaert

 

Die met goede Redenen gheopenbaert

 

Uan welcken Prijs verdient heeft met Wijsheden,

 

Scientie verheft, in Consten vermaert,

 

En heeft nettelijck metter Waerheyt beleden,

 

S'Gheests Wijsheyt, inden Mensche ghedaelt met Vreden.

 

Goetwillich van herten, reyn int verkeeren // heeft

 

Oock ghedoceert, met ghemanierde Seden,

 

Den wijsen raet, die de kennis des Heeren // heeft.

 

Noch Waer S. D. Waerheyt, oock Prijs met Eeren // heeft

 

Uerdient: hebbende voor Antwoorde gheschreuen,

 

D'welck hy ghevoeydt in sijnder Leeren // heeft,

 

Der Regenten Wijsheyt, hun van Godt ghegheuen.

 

Noch moeste hun van t'Liedeken Prijs aencleuen

 

Scientie verheft Constich int bybringhen:

 

Daer nae Goetwillich van herten, verheuen,

 

Weest dat ghy zijt. hadde het soetste singhen

 

Met Musicalen voyse sonderlinghen:

 

In Hollant heeft hy residentie

 

Tot Reynsburgh: Dus bedanct v voor allen dinghen,

 

T'Corenbloemken van dijn schone Inuentie:

 

Begheerende met Diligentie,

 

Dat ghy alle wilt laboreren altijt

 

In de loffelijcke Scientie

 

Uan Rhetorica, die elcken verblijt,

[fol. A7r]

 

Laet v den Arbeyt niet verdrieten, wie ghy zijt,

 

Doende uwen Naesten confortatie,

 

Hier me' blijft bevolen Godts milde Gratie.

VAERT WEL.