Refereynen ende liedekens

§ Den Drucker totten Leser.

MIchiel van Hamont Printer ghesworen,
Wenscht alle goetwillighe Lesers welvaren,
Biddende, wilt in desen Boeck vercoren,
Neerstichlijck lesen, en uwen gheest verclaren,
Ghy meughter den droeuen moet mede ontswaren,
Singhende Liedekens met diuerscher wijsen,
Schoon Refereynen haer hier in openbaren
Int Ghetal t'Seuentich, om elcx verjolijsen,
Uijue isser daer, sonder Deuijsen,
Int stede van die niet en mochten passeren,
Op diuersche Feesten, winnende prijsen:
Hier inne soo wilt toch speculeren,
Sy sullen v alle Deucht doceren.
Uoorts tot elcx gherieue, soo is ghestelt mede,
Bouen elck Refereyn (wilt dit noteren)
T'Componists deuijse, Camere, en Stede,
En nae Regule des Lotens houdtmen Sede,
De Prijsware laetmen oick claerlijck blijcken.
Dus beminde Lesers, beminnende Urede,
Deursoeckt, leest, singht, wilter niet afwijcken,
Uerlaet Ledicheyt, Erm metten Rijcken,
Weest neerstich om weten, elck nae sijnen Staet,
Want Ledicheyt is Moedere van alle Quaet.

Uaert wel.