|
| |
Van galileen.
Van desen lande van samaritanen, daer jc v of seide, men gaet te
pleyne van galyleen ende men laet tgheberchte op deen zide ende galylee es een
prouincie vanden lande der ghelooften. Jn dese prouincie sijn die steden naym
capharnaum, bethsayda ende corisaym. Van bethsayda was sinte pieter ende sinte
andries ende op iiij milen na daer bi es corosayda ende van corosayda toter
stat van ceder sijn v milen, daer of dattie souter seit: Et habitani cum
habitantibus cedar, jc woonde mitten wocnenden te ceder. Jn die stat van | |
| |
corosaym sal antekerst worden gheboren . . . . . alsoe die
profete seit: De babylone colober exiet qui totum mondum deuorabit, dats te
segghen: vut babilonien sal vutgaen een slanghe, die alle die werelt verslinden
sal. Dese antekerst sal te bethsayda worden ghevoet ende in capharnaum sal hi
regneren ende daer om seit die scriftuere: ve tibi corosaym, ve tibi bethsayda,
vc tibi capharnaum, dats te segghende: wee dy stat van corosaym, wee dy stat
van bethsayda, wee dy stat van capharnaum. Ende alle dese steden sijn int lant
van galyleen. Ende canagalylee es op iij milen na nazareth; van dese stat was
symon cananeus ende dat wijfkijn van cananee, daer dat ewan\gelium | |
| |
of spreect. Daer dede onse here dat eerste miracule ter bruloft van
architriclinen, doe hi vanden watre maecte wijn. Ende int eynde van galileen
jnt ghebercht was gods arke ghenomen ende op dander zide sijn die berghe van
endor ende hermon. Ende daer omtrent loopt een riuiere torrens asson, diemen
anders heet torrens radaum. Daer neuen barac abrimelichs zoon met delbore des
propheten zoen verwan theer van ydumeen, doe cysara die coninc was ghedoot van
ghebolle, akers wiue ende jaechden mit crachten ouer die riuiere van den
jordanen zeb zebee ende salmana, daer hise doot sloech. Ende in xv milen na
naym es die stat van israel die anders geheten is sarayn, van der welker stat
bexabele die quade coninghinne was, die met haere cracht wech | |
| |
dede doen den wijngaert naboth. Bij deser stat es tfelt magheden,
daer die coninc joras wart ghedoot vanden coninc van samarien. Ende wart doe
be\grauen opten berch van syon in eenre milen na jherusalem daer die berghe van
gelboe sijn, daer saul ende jonachster die so scone waren ghestoruen, waer omme
datse dauid vermaledide, also die scriftuere tuucht: Montes gelboe nec ros nec
pluuia descendat super uos, dats te segghene: o berghe van gelboe, noch dau,
noch reghen en moet op v niet dalen. Jn eenre milen na van desen berghe van
gelboe ten oosten waert es die stat van sacople, die men heet bethsaym. Op die
muer van deser stat was saul | |
| |
des conincs hooft
ghehanghen. Ende daer na gaetmen te nazareth door die berge biden pleyne van
galylee. Nasareth plach te sijn een scoen grote stat, mar nv ist een cleine
ende keytiuich stedekijn ende die huse staen verre van een, hier een ende daer
een ende en es nict ghemuert ende staet in een cleyn dal ende al omme ende omme
so staen berghe. Daer wart onse vrouwe gheboren ende daer om droech onse here
sinen toenaem van deser stat. Daer nam joseph onse vrouwe te wiue, doesi mer
.xiiij. jaer en hadde. Daer so gruetse die enghel gabriel segghende: Aue maria
gracia plena, dominus tecum, dats te segghen: god gruete v vol van gracien, die
here is mit di. Dit ghesciede voor een outaer van eenre scoonre | |
| |
kerken, die nu daer niet en is, mer men heeft daer een cleyne
woninghe ghemaect bi enen pylaerne van die kerke om die offerande te ontfane
vanden pelegrimen ende die sarasine hudent herde naerstelike om tgroot profijt,
dat si daer of hebben. Ende dese sarrasine sijn vele quader ende wreedder dan
eldere, want si hebben alle die kerken ghedestrueert. Daer staet die fonteyne
gabriels, daer onse here in plach te badene, doe hi cleyn was. Van deser
fonteinen droech hi dicwil sijnre moeder. Jn dese fonteyne so wiesch onse
vrouwe haren soon jhesus kerst dicke wile sijn doeckine. Ende van daer tot
jherusalem sijn .iij. dachuaerde ende te nazareth was onse here gheuoet.
Nazareth is te segghen boomgaerts bloeme. Seker | |
| |
mit
recht ist so gheheten, want daer wart op ghehouden jhesus kerstus, die bloem
ende vrucht des leuens es. Ende in iij milen na nazareth . . . . . te accon
waert een halue mile in gheen zide nazareth es dat bloet ons heren. Want die
joden leyden op eenen hoghen steenroots om hem neder te werpene ende ene te
dodene, mer hi leet ende ontquam door hem ende spranc op een ander rootse. Ende
daer om segghen enighe liede, als si hem in enighen wech veruaren van
moordenaren ofte van haren vianden: jhesus autem transiens per medium illorum
ibat, dats te segghene: jhesus ouerlidende ghinc mids door hem, jn
ghodenckenisse dat, also jhesus kerst leet mids door die wrede joden
behoudelijc ende van hem ontquam, so moeten si ont\gaen | |
| |
den mordenaren ofte haren vianden. Ende dan seitmen dese twee vaersen
vanden souter: jrruat super eos formido et pauor in magnitudine brachij tui
domine fiant immobiles sicut lapis donec pertranseat populus tuus iste quem
possedisti, dats te segghene: here, in die groot. heit dijns arms, dat es dine
macht, moete op hem scaemte vallen ende vrese ende moete onverruerich werden
als een steen tote dat dijn volc leden si, dattu besits. Ende dese verse
seitmen driewerf ende dan lijdt men metter hulpen gods sonder vrese. Ende weet,
dat onse vrouwe onse here baerde int vijftiende jaer. Ende si wandelde mit hem
xxxiij. jaer ende iij maende ende na sijn doot leuede si xxxiij jaer.
|
|
Auteursrechtelijk beschermd