|
| |
Der sarrasinen gheloue.
Om dat jc ghescreuen hebbe hier bouen vanden sarrasinen ende van
haren lande, so sal jc v nu segghen van haren gheloue, op dat ghi wilt, na dien
dat hare boeke van haren gheloue in heeft, datmen heet alkoram ende hem leert.
Ende someghe liede heetent harme na dien dat hare sprake zijn. Dit boec gaf hem
mahomet, jnt welke es ghescreuen also jc dicwille hebbe ghesien ende ghelesen,
dat die goede sullen int paradijs gaen ende die quade in die helle ende dat
ghelouen die sarrasinen. Ende ist dat ment hem vraghet, in wat paradijs si dat
verstaen so segghen si, | |
| |
dattet es een stat van weelden,
daer men vint alrehande maniere van froyte in allen tiden vanden jare ende dat
daer sijn lopende riuieren van melke ende van zeeme ofte van honighe ende van
wine ende van zueten watre ende datmen daer vinden sel scone ende rikelike
huse, na dat een yghelic verdient sal hebben, ghemaect van dierbaren
ghesteynte, van goude ende van siluer. Ende een yghelijc sal daer wiue hebben
maechden ende sal die macht ende dien lust ende twerc hebben altoos met hem te
ligghene ende te sine, nochtan sal hise altoos maecht vinden. Jtem si ghelouen
wel ende horen wel spreken vander maecht marien, onser lieuer vrouwen ende
vander incar\nacion, | |
| |
dats aneneminghen der menscheit ons
heren ende segghen wel, dat maria was van dien ynghel gabriel gheleert ende
dinghel haer groete ende hair seide, datsi wtuercoren wair ende dat hi
bootscapte onser vrouwen die incarnacion ofte gheboorte ons heren jhesus kerst
ende dat si maecht was int ontfaen ende maecht bleef int baren van hem. Ende
dit selue seit alkoram ofte haer boeke. Ende dit boec alkoram seit, dat jhesus
kerst sprac also saen, als hi was gheboren ende dat hi een heylich prophete was
ende wairachtich in woorden ende in werken ende dat hi goedertieren was ende
ontfermhertich ende gherechtich zonder enich zonde. | |
| |
Ende
haer alkoram ofte boec seit ooc, dat doe die ynghel bootscapte die gheboorte
ons heren jhesus kerst der maecht marien, dat si jonc was, waer omme dat si te
meerre vaer hadde. Want in dat lant was een gokelaer, die tabina hiet, die hem
ghelijc enen enghel maecte ende ghinc dicwile mitten maechden slapen, waer omme
maria hair veruaerde vanden ynghel, om dat si waende dat waer die gokelaer
voorseit, diese bedrieghen woude ende si beswoer den ynghel, dat hi hair seide,
of hijt waer. Ende die ynghel antwoorde haer dat si ghenen vaer en hadde ende
dat hi sekerlijc die bode gods ware. Jtem noch seit haerre lieden boec, dat doe
maria hadde jhesus ghebaert onder enen | |
| |
boom van palmen,
daer die cribbe van den osse ende vanden esel stont, datsi haer scaemde om dat
si een kint hadde ende weende ende seide, dat si doot woude sijn ende doe
staphants sprac haer tkint toe ende troostedse ende seide: moeder en mistroost
v niet, want god heeft in dij ghesendt sijn heymelicheit omme die salicheit der
werelt. Ende te vele andren steden seit haer boec, dat onse here ooc also zaen
sprac, als hi gheboren wart. Ende dit boec seit ooc, dat jhesus gheseint was
vanden aelmachtighen god om exemple te sijn ende leringhe allen menschen. Ende
dit boec spreect ooc vanden doemsdaghe, hoe god sal comen doemen allen
creaturen. Ende die goede sal hi met hem trecken te sinen deel ende die quade
sal hi verdoemen in die helle. Ende het seit | |
| |
ooc, dat
jhesus onder alle andre propheten was die meeste ende naest gode ende dat hi
die ewangelie maecte, in die welke goede leringe sijn ende salighe maninghe
ende claerheit ende waerheit ende ghewairighe predekinghe den ghenen, die aen
gode ghelouen ende dat hi een warachtich prophete was ende sonder zonde ende
dat hi die blinde siende maecte ende die lasersche ghesont ende die doode
opuerwecte ende dat hi te hemel voer al leuende. Ende als si moghen hebben een
boec vander ewangelien ons heren ende sonderlinghe daer in ghescreuen es:
missus est gabriel angelus, dat si dicwile segghen in haer ghebede, die
gheleert sijn, dat cussen si ende aenbedent mit groter deuocien. Jtem | |
| |
si vasten ij maende al gheheel jnt jaer ende en eten dan
niet dan des nachts ende si hueden hem dan ooc wel van haren wiuen alle daghe
van desen maenden, mer si die siec sijn en sijn niet ghebonden te desen vasten.
Jtem dit boec spreect vanden joden segghende, dat si quaet sijn om dat si niet
ghelouen en wouden, dat jhesus van gods weghen quam ende om dat si valschelike
loghen vander maghet maria ende van haren zoon om dat si seyden, dat si jhesum
hadden ghecruust, want die sarrasinen segghen, dat hy niet ghecruust en was,
mer god deden tot hem clymmen te hemele zonder verminken ende zonder steruen
ende dat hi sine figure in enen andren man verwandelde, dien die joden
cruu\sten | |
| |
ende segghen, dat judas was, mer si waenden
dat jhesus hadde gheweest ende dat jhesus al leuende te hemel voer ende vandaer
weder comen sal omme die werelt te ordelen ende segghen, dat die kerstene hier
of gheen bekinnen en hebben ende segghen, dat si sottelijc ende valschelijc
ghelouen, dat god ghecruust wart ende segghen ooc, had hi ghecruust gheweest,
dat god hadde ghedaen jeghen sine gherechticheit, hadde hi ghedoghet, dat
jhesus ghecruust hadde gheworden, die onnosel ende zonder sonde was. Ende in
dit aertikel segghen si, dat wi ghemissen van goeden gheloue ende dat die grote
gherechticheit gods en mochte so groot onrecht noch ouerdaet niet ghedraghen
ende daer in mist haer gheloue. Want | |
| |
si bekennen wel die
werke ons heren jhesus kerst, dat si goet sijn ende sijn woerde waerechtich
ende dat sijn ewangelien wairachtich sijn ende sine lere ende sijn miracle ende
dat die goede heylighe maecht marie was goet ende een heylich maecht voor ende
na die gheboorte ons heren jhesus christus ende dat die ghene, die in gode
volcomelijc ghelouen, sullen behouden sijn. Ende daer omme dat si so na onsen
gheloue gaen, sijn si lichtelijc tonsen gheloue bekeert, al so men hem predict
besceydelijc tgheloue ons heren jhesus christus ende die prophecien. Ende si
segghen ooc, dat si wel weten vten prophecien, dat die wit mahomets te gaen
zal, also die wet der joden ghedaen heuet ende dat die wet der kerstene sal
duren toten eynde der werelt. Ende als\men | |
| |
hem vraecht
wat si ghelouen, si antworden datsi ghelouen in gode scepper des hemels ende
der aerden ende alle andre dinghen, die al ghemaect heeft. Ende zonder hem en
is niet ghemaect ende si ghelouen den doemsdach, in welken een yghelic geloent
sal werden na syn verdyente. Ende si ghelouen, dat al waer, si dat die heylighe
propheten hebben gheseit.
|
|
Auteursrechtelijk beschermd