Soela 1962-1964

[p. 18]

johan pont

Angri
set' en tjari n'in joe kondre,
Blaka Brada.
A tap joe doengroe fesi no wan
lafoe sa man koiri psa,
sref' joe finga no sa man foe
pré apinti-dron, di kibri
n'in wan oekoe lek' ferlégiman.

A srapoe tifi
foe na angr'e kot' joe bere,
Blaka Sisa.
Angri
swar' joe krakti, swar a meti
na joe skin, pe fow bonjo e sor' den
srefi f'mek kroederi nanga takroe dede!

Ma wortoe ben sa froestoe tan
na ini mi djodjo ef' mi no ben sa kar'
a Kongo-fowroe, di e froiti psa,
foe g'en wan ai Sranan alési.

Dan singi sa hari, dan lafoe sa bari,
dan finga sa loeso efoe lofro na dron,
dan angri sa Go lek' fa angri ben Kon.

[p. 19]

Joe moi kon brok' a kopro sroto
di ben tap joe glori.....
Kotomisi,
moro m'e loek joe, moro j'e moi.

Granman-oso opo fraga;
wan safri wint'e sing' joe glori
n'in den palmbon,
Srananliba brad'en mindribaka
f' naki prodo skwala,
strati tapoe:
Kotomis'e spenki pipel ai.

Angisa wai! angisa panja j'glori,
koto, sor' joe boegoe-boegoe!
koto, tak joe tori.
Kotomisi mek' kemaakte:
moro d'e loek joe, moro j'e moi.