Trotwaer. Jaargang 5

[p. 2]

Redaksioneel

Mei dit nûmer set de fyfte jiergong fan Trotwaer útein. Neat om greatsk op to wêzen fansels, mar faeks al even in stuit om jin ris ôf to freegjen hoe't it fierder komt.

Dêrom liket it ús goed ta en set ien en oar al fêst ris op papier, ús program en ús plannen.

Yn de fakatuere Remco Heite is forsjoen troch it oanlûken fan Tr. Riemersma. Mei greate mearderheit fan stimmen, demokratysker kin it ek al net. De rounte wurdt hwat lyts, de oaren kinne har mar klearmeitsje.

Troch minder wikseling fan redakteuren as yn it forline wol ris it gefal west hat hoopje wy it sicht op Trotwaer ek hwat dúdliker meitsje to kinnen. Elk jier ien der út moat it mar by bliuwe. De yn 1972 ynsleine rjochting wol de redaksje fierder folgje. De krityske biglieding fan de fryske literatuer, fan theoretysk stânpunt út, sil hooplik fuortset wurde kinne. De relaesje literatuer - maetskippij sil neijer omtinken krije. Mar ek kréative bydragen forwachtsje wy yn great forskaet to krijen en to publisearjen.

[p. 3]

Trotwaer bliuwt, of wol dat wer wurde, in podium foar de literaire túnker, foar de routinier sawol as foar de aspirant.

Polarisaesje mei ús net barre.

Kwaliteit moat noarm wêze. De diversiteit fan de redaksjeleden liket ús garânsje genôch om elk lûd oan bar komme to litten.

Yn dizze jiergong hoopje wy in tal artikels oer de fryske literaire krityk fan de lêste fiifentweintich jier publisearje to kinnen. In ûndersyk nei de relaesje tusken de fryske skriuwer en syn tael is alto lang yn 'e pin en moat dit jier ek klear. De poëzy moast eins dit jier ris hwat mear omtinken ha. En dan komt der fan 't hjerst in nûmer út dat alhiel wijd wêze sil oan it fryske stripforhael. Jawis, hwa't noch hwat kwyt wol moat avensearje, de jiergong is al in ein hinne fol.