Skiplinks

  • Tekst
  • Verantwoording en downloads
  • Doorverwijzing en noten
Logo DBNL Ga naar de homepage
Logo DBNL

Hoofdmenu

  • Literatuur & taal
    • Auteurs
    • Beschikbare titels
    • Literatuur
    • Taalkunde
    • Collectie Limburg
    • Collectie Friesland
    • Collectie Suriname
    • Collectie Zuid-Afrika
  • Selecties
    • Collectie jeugdliteratuur
    • Basisbibliotheek
    • Tijdschriften/jaarboeken
    • Naslagwerken
    • Collectie e-books
    • Collectie publiek domein
    • Calendarium
    • Atlas
  • Periode
    • Middeleeuwen
    • Periode 1550-1700
    • Achttiende eeuw
    • Negentiende eeuw
    • Twintigste eeuw
    • Eenentwintigste eeuw
Trotwaer. Jaargang 14 (1982)

Informatie terzijde

Titelpagina van Trotwaer. Jaargang 14
Afbeelding van Trotwaer. Jaargang 14Toon afbeelding van titelpagina van Trotwaer. Jaargang 14

  • Verantwoording
  • Inhoudsopgave



Genre

proza
poëzie
sec - letterkunde

Subgenre

tijdschrift / jaarboek


© zie Auteursrecht en gebruiksvoorwaarden.

Trotwaer. Jaargang 14

(1982)– [tijdschrift] Trotwaer–rechtenstatus Auteursrechtelijk beschermd

Vorige Volgende
[pagina 305]
[p. 305]

Eppie Dam
Dichters Deiboek

Snein, 22 febrewaris 1981.

 
At eagen prate koene, soe men skriuwe
 
kinne - no binne al dy dingen ûnútspreklik
 
moai, no bliuwe al dy dingen allinne
 
sa breklik yn har eigen skjintme, dat, dat -
 
dat inkeld tinken al har djip skansearret,
 
ja, sels de skyn fan wyt papier
 
wie al in stap te fier, lit stean
 
it taasten nei de pinne.
[pagina 306]
[p. 306]

Tongersdei, 19 maart 1981.

 
In nije maityd
 
en in nij masinelint:
 
op it skerp fan myn tinzen
 
lûk it de grinzen tusken
 
werklikhyd en werklikhyd,
 
wierhyd en wierhyd wurde wer twa,
 
do en ik, sa't it heart
 
wurdt it nea net wer.

Sneon, 27 juny 1981.

 
Ald leafdefers weromfûn.
 
Leave santjin, wêr helle men de wurden wei?
 
In oare taal moat yn in kitschich kaartebakje
 
njonken it papier stien ha, in falsk palet
 
fol sketterjende kleuren. Wie it maityd, simmer,
 
hjerst en winter tagelyk? En rûnen alle oséanen
 
yn deselde opfeart gear? It wie yndie myn eigen
 
hân dy't it dronkene pinsiel ferweegde, de pinne
 
dûnsje liet ta de hichten fan in blyn en bol-
 
bjirken jûchhei. Skandalich, wat moatsto ivige
 
lilk west ha, sa prachtich at ik dy beskriuw!
[pagina 307]
[p. 307]

Snein, 27 juny 1982.

 
Binne dit soms flinterkes fan tinzen
 
dy't syn lippen hjirre priuwkjend
 
út 'e harsens blaze? En waakset
 
dêr oan 'e grinzen fan syn mûle
 
aanst in ripe, prachtige gedachte,
 
like breklik as in ballontsje fan sjippe
 
en trochsichtich as in simmerdream? O,
 
koe ik sa skriuwe en myn harsens snute
 
-blowin' the brains!- om dizze tizeboel
 
fan tûkeltinzen te formearjen
 
ta in hillige karaf: ien fers
 
dat by it minste tikje tsjin 'e râne,
 
splinters reine sil, sa geef.
 
 
 
(Titel: De glêsblazer)

Tiisdei, 22 septimber 1981.

 
Fan tichterby besjoen in dichterlik seizoen:
 
de hjerst. It ljocht falt oppenij
 
waarm en dûnker om myn skouders hinne
 
as in pij fol skaden yn har stille tearen.
 
Alle kearen at ik amje, klamje har de siken
 
fêst oan myn gewaad - ik bin in mûnts,
 
in mûs, sa griis bin ik en wiis mei alles
 
wat fan boppen komt: in wurd, it blêd
 
dat falt, optild wurdt, sweeft, falt, dan
 
leit - dwers yn 'e kontekst
 
fan it fers dat jin de dea oanseit.
[pagina 308]
[p. 308]

Septimber 1981

 
Rein en dize tagelyk,
 
dy dyk besaaid mei drek
 
en smotsich rotsjend bitelof,
 
net dalik stof foar kleare poëzij,
 
mar dêr stie sij: Ready Maid,
 
in pear gibbige hoazzen
 
yn ankelhege bûntlearskes stutsen,
 
in feale reinjas oan, de mulbân om,
 
roazige skûmplestiken rollers yn 't hier,
 
dêr in holdoekje oerhinne
 
en mei in syklaam ûnder de earm
 
by in bushalte ûnder Blija -
 
ienkear moat in dichter alles meiha.

Freed, 6 novimber 1981

 
Hjoed mei eigen eagen sjoen
 
wêr't men net mei goed fatsoen oer skriuwe kin.
 
Emmeloard, midden op 'e Lange Nearing
 
op in freedtemiddei healwei seizen yn novimber:
 
dat hieltyd op inoar ynhappen en ûnder-
 
tusken it krôljen fan priuwkjende tongen,
 
it betaasten fan stickers op in spikerbroek
 
troch streakjende fingers en it geknoffel
 
mei in fyts - dat wier is in aardichheid,
 
mar net genôch foar in fers.
 
Oars wurdt it at men immen fine kin,
 
dy't mei grutte eagen dêrnei sjocht.
 
Mar wat as poëzij miskien
 
it bêst foldocht, is skriuwe hoe't in treddenien
 
sa'n tút-itend spantsje syn voyeur besjocht.
[pagina 309]
[p. 309]

Sneon, 7 novimber 1981.

 
Redaksjegearkomste hân by Jan Wybenga yn Grins.
 
Nei de grientesop en de brune boltsjes
 
sette Jan syn Sijke mei fêste hân
 
in prachtich triljende pudding op 'e tafel,
 
nei dalik bliken die, laden mei emoasje:
 
Op oantrún fan de hearen literatoren
 
kroep dochter Annemieke yn in moaie wide trui
 
achter de piano en spile Imagine
 
there is no heaven fan John Lennon silliger.
 
Oene woe him noch ûntskuldigje,
 
mar ear't er it keare koe,
 
wied er al oan 't sjongen,
 
like suver as in hillige yn 't koar.
 
Geart siet derby
 
en stoarre in bytsje weemoedich foar him
 
út: it wie syn lêste gearkomste. Imagine there is
 
no heaven - wie der libben nei Trotwaer?
 
Sijke line mei de earmtakken op it tafelblêd
 
en sûgde sinlik oan har filtersigaretsje,
 
wylst Jan pypkjendewei
 
yn syn geitefellen profetefestje
 
as in ingel troch de keamer spaande.
 
Imagine there is no heaven?
 
As hie der ea in ierde west!


illustratie


Vorige Volgende

Footer navigatie

Logo DBNL Logo DBNL

Over DBNL

  • Wat is DBNL?
  • Over ons
  • Selectie- en editieverantwoording

Voor gebruikers

  • Gebruiksvoorwaarden/Terms of Use
  • Informatie voor rechthebbenden
  • Disclaimer
  • Privacy
  • Toegankelijkheid

Contact

  • Contactformulier
  • Veelgestelde vragen
  • Vacatures
Logo DBNL

Partners

Ga naar kb.nl logo KB
Ga naar taalunie.org logo TaalUnie
Ga naar vlaamse-erfgoedbibliotheken.be logo Vlaamse Erfgoedbibliotheken

Over dit hoofdstuk/artikel

auteurs

  • Eppie Dam


datums

  • 22 februari 1981

  • 19 maart 1981

  • 27 juni 1981

  • 27 juni 1982

  • 22 september 1981

  • september 1981

  • 6 november 1981

  • 7 november 1981