Trotwaer. Jaargang 20

[p. 234]

Jelle Kaspersma

ôfsniene bocht by twelve mik point

it is fjirtich graden yn it skaad
en swittend stap ik hoeden efter him oan
oer it fan rattelslangen ferjûne lân
yn in âld bocht fan 'e northern canadian

fiifentachtich jier histoarje
knjirpet jin ûnder de fuotten
no sundance for 1904 skreaune de deskundigen
mar dit stee leit lykas doe noch altyd
út it sicht fan al te nijsgjirrige veho

myn maat seit
dizze grûn is ús fleis en bloed
it blau hjirboppe is ús loft
bloed en loft binne de kleuren fan ús tsjerke

ik sykje se op
fragminten en splinters fan bonken
klútsjes reade klaai
wat oerbleau fan in tetrape en ôfslachte folk

[p. 235]

david

waans flok soe er dochs drage
no't alles him by de hannen ôfbrekt
wa soe him dochs betsjoene

lûder klinke stimmen yn 'e skimer om syn hûs
foarâlden besykje him te hoedzjen foar it ûnk

de sinnedûnser en skilder fan dûnsers
wol graach ferjitte en drinkt
hy sprekt tsjin 'e moarnsdage as tsjin in freon

tegearre harkje wy nei de lûden fan mistah
ús bier stiet op 'e moterkap
wy drinke de deaden ta en motsje

dan giet er yn 'e hûs en jout him del
yn de opkommende gleonens fan in nije dei
wilens groetsje ik dronken sinne en freegje
om in effen paad foar myn swier teheistere broer

[p. 236]

luther whitehorse

lit my de foto sjen fan syn bataljon
nommen yn trijeënfjirtich
foar omaha-beach en ardinnen-offinsyf
allegearre sneuvele laket er
op dizze knaap nei
wylst docht er in fikse haal oan syn marihuana-sigaret

trije dagen lei er foar dea yn 'e snie fan bastogne
syn sibben fernamen dat er sneuvele wie
joegen syn hiele besit wei
seis teannen liet er efter yn belgië
amputearre oantinkens oan 'e dútsers
dy't er noch altyd wol sjitte kin

syn hân omklammet it âlde gewear mei de lêste fjouwer patroanen
de kleare blauwe eagen sjitte fjoer
de oarloch tsjin 'e veho is noch lang net ôfrûn

yn myn bûse fiel ik it mes dat er slipe en file
sadat allinnich de punte noch mar skerp woe
syn wêzen stal jûn yn de ûnmacht fan dit stiel

[p. 237]

kim

har brutsen gesicht laket om it libben
want barsten sitte oant djip yn har siele
in auto-ûngelok tebriek har noas en kaak
it ferlies fan man en bern har siele
hja besocht it fjoer fan har fertriet te dwêsten
mei drank drugs pillen in skearmes

stiloan is hja lykwols by ús
en har brutsen gesicht laket om it libben

ik sjoch har linige fingers gean
kraaltsjes wurde borduerd yn in âld famyljepatroan
de kreazens fan har holle hier en eagen
in prachtich patroan fan libben
dat ienris weiwurde sil mei har profyl