De Tsjerne. Jaargang 1

[p. 349]

Geart Jonkman:
Hora est

Jo biidzje Hear
ik kom jo yn 'e mjitte
mar 'k bin sa jong...

Dêr bloeit de flear
en lit my net forjitte
't flammich wynsel,
suver om 'e nocht
lâns d'himel lutsen;
wûnder skynsel
yn Jins strieljend ljocht
fan prisma brutsen.

Ik kom,
de lêste gong
falt lykwols swier.

Mij bynt in faem,
har ranke least
en eagen fan flewiel -
de wrede raem
fan fleis en geast
en 't spjalten fan de siel -
mear as de pracht
fan orchidé
en anjelier

èn fan Jins stjerrenacht,
casette fan jewiel...

De brune ré
leit yn it bosk to sliepen.

O lit my
op dit sté,
mar hâldt Jins poarte iepen.