De Vorsterman Bijbel

[p. π2r]

§ Extract wten Registere vanden Vonnissen, der wethouderen der stadt van Antwerpen.

ALsoe Willem Vorsterman printer, poirtere ende ingesetene der stadt van Antwerpen, den Eerweerdigen zeere wisen ende voorsienighen heeren Borghermeesteren ende Scepenen der voorseyder stadt, geremonstreert ende verthoont heeft, dat hoe wel hi met grooten arbeyde, coste ende ernstiger diligencie heeft doen drucken, den Bible, inhoudende Doude ende Dnieuwe testament in nederlantscher duytscher talen, ende tselue alsoe tzijnen grooten swaren coste ende laste, wtgestelt ende ouergheset is gheweest, by gheleerde ende ghetrouwe ouersetters ende interpretatuers inder Hebreuscher, Griecscher ende Latijnscher talen, gheleert ende expert zijnde, ende de selue translatien met diuersche onghecorrumpeerde Biblen, niet suspect wesende van eenighen merckelijcken erruere, ghetrouwelijc doen collationeren, ouersien, ende corrigeren, Desen nochtans niet tegenstaende vanteren ende vermeten hen eenighe printers inder voorseyder stadt, den voorseiden Willeme, den seluen Bible nae te willen drucken, tzijnder verderffelijcker ende onuerdrachgelijcker schaden ende verliese, Ende alsoe oock de voorseyde Willem gheexhibeert heeft sekere brieuen ende mandementen van octroyen ende accordacien byder, K, M, ende sinen Rade den voorseyden Willeme vorsterman verleent, vander date des seuensten daghes van Iulio, Int Iaer ons Heeren duyst vijfhondert ende veerthiene, Gunnende, oirlof ende consent geuende, wt singulierder gratien, den voorseyden Willeme, dat hi vanden daghe voorschreuen soude moghen wtgheuen, printen, oft doen printen, ende vercoopen inder voorseyder stadt van Antwerpen, oft elders binnen den lande ende heerlijcheden van herwaerts ouere, alle alsulcke boecken, acten, volumen, ende nieuwe wercken, niet te voren geprint gheweest hebbende in alsulcker talen als hem dat goet duncken soude, Ende ten eynde dat de selue Willem Vorsterman niet en soude verliesen zijn moeyte ende arbeyt, midtsgaders de costen ende lasten die hi behoeuen soude ende supporteren, omme de voorseyde nieuwe printinghe te doene, met desser aencleuen mach, verbiedende allen anderen printeren, dat si binnen drie iaren daer nae, die gelijcke substancien alleene, noch met eenigher additien, inden voorseyden landen, niet en printen, noch en doen oft laten printen, gelijc tselue breeder blijct biden tenuere ende inhoude des voorseyden mandements, ende noch eenen anderen mandemente, inder seluer materien, vander date des derthiensten daghes van Septembri vijfthien hondert iaer ende veerthiene, oock den voorseyden wethouderen byden voorseyden Willeme ouergegeuen ende gethoont Ouersien ooc tconsent byden Eerweerdighen ende hoochgheleerden heere ende doctuer inder godtheyt, heeren ende meesteren Niclaes Coppijn deken van sinte Peeters kercke tot Louen, ende Cancellier des vniuersiteyts aldaer, daer toe gedragen, midtsgaders den consente van Heeren Claese van Lijre Riddere heere tot Berchem etcetera. Schoutet Thantwerpen, voorseyt, ende Merckgraue slandts van Rijen daer toegedragen, ende op al rijpelijc gelet, So is byden voorseiden Heeren Borghemeesteren ende Scepenen voorseyt, den voorseyden Willeme vorsterman geghunt ende geaccordeert, dat hi de voorseyde Biblen sal mogen venten ende vercoopen, ende voorts allen ende yegelijcken druckeren ende printeren poirteren oft ingesetenen inder voorseyder stadt van Antwerpen woonende oft residerende, verboden eenighe duytsche Biblen, in nederlantscher talen gestelt zijnde, van desen daghe in drie iaren naestcomende ende eenpaerlijc daer nae veruolghende gheduerende, niet te moghen printen, noch drucken, in eeniger manieren, noch elders na dexemplar des voorseyde Willems ghedruct ende gheprint zijnde, gheduerende den tijt van drie iaren inder voorseyder stadt niet te moghen vercoopen, Op dye pene ende correctie van drie hondert Carolus guldens te verbuerene biden ghenen die desen contrarieerde, soe dicmale als tselue beuonden sal worden, Te bekeerene in drien deen derdendeel daer af, den Heere, dandere deel, der stadt, ende het derdendeel, den ghenen diet aenbrenghen cundigen ende te kennen gheuen sal. Aldus ghedaen des Vridaechs, negen daghen in Nouembri .xv^c. iaer ende .xxviij.

PLUS.OVLTRE

[afbeelding]

P. Gielis.