De Vorsterman Bijbel

§ Dat .vij. Capittel.

1

⁺+ HIer nae wandelde Iesus in Galileen, Hy en woude niet wandelen in Iudeen want die Ioden sochten hem te dooden.

+ A

2

Ende dye hoochtijt der Ioden Scenophegia was nakende.

3

Daer om hebben zijn broeders tot hem geseyt. Gaet van hier, ende gaet in Iudeen, op dat v discipulen oeck mogen sien, die wercken die ghi doet.

4

Want niemant en doet yet int heimelick, ende begeert openbaer te wesen. Ist dat ghi dese dinghen doet, verclaert v seluen der werelt.

5

Want zijn broeders en geloofden ooc in hem niet.

6

Daer om seyt Iesus haer. Minen tijt en is noch niet gecomen. Maer v tijt is altoos be-[kolom]reyt.

7

De werelt en mach v niet haten, maer si haet mi, want ick gheef getuych van haer dat haer wercken quaet zijn.

8

⁺Climt ghi tot desen feestdach. Ick en sal niet op climmen, tot dese hoochtijt, want mijnen tijt en is noch niet veruult.

+ B

9

Ende als hi haer dit geseyt hadde, is hi in Galileen ghebleuen.

10

Als zijn broeders op geclommen waren, doen is hi oock op geclommen totter hoochtijt, nyet openbaer, maer als int heymelick.

11

Daer omme sochten hem die Ioden op die hoochtijt, ende seyden Waer is die?

12

Ende daer was veel murmuracie onder die scharen, van hem. Want sommige seyden. Hy is goet. Ende die ander seyden. Neen, maer hy verleytet volck.

13

Nochtans en sprack nyemant openlijck van hem om vreese der Ioden. *

14

+ Nv, als dye hoochtijt te haluen gecomen was, so is Iesus op geclommen inden tempel: ende leerde.

15

Ende die Ioden verwonderden hem seggende. Hoe can dese scriften, na dien, dat hijse nyet geleert en heeft?

16

Iesus heeft haer geantwoort, ende geseyt. Mijn leeringe en is mi niet, maer des genen die mi gesonden heeft

17

Ist dat yemant wil zijnen wil doen, die sal bekennen van mijn leeringe oft si wt god is, ofte of ick van mi seluen spreec.

18

Die van hem seluen spreect, die suect zijn eygen glorie. Mer die daer suect dye glorie des ghenen die hem ghesonden heeft, dese is waerachtich, ende onrechticheyt en is in hem niet.

19

⁺En heeft Moyses v die wet niet gegeuen? ende nyemant van v en doet die wet. Waer om suect ghi my te dooden?

+ C

20

Die schaer heeft gheantwoort, ende gheseyt. Ghy hebt den duuel. Wie suect v te dooden?

21

Iesus heeft gheantwoort, ende haer geseyt. Een werck heb ick gedaen, ende ghy verwondert alle gader.

22

Daer om heeft Moyses v dye besnidenisse gegeuen, nyet datse wt Moyses is, maer wt den vaderen. Ende nochtans besnijt ghi den mensch opten Saboth.

23

Ist dat een mensche de besnidinge ontfanct opten sabboth, ende die wet van Moysi nyet ghebroken en wort. Waer om veronwaerdicht ghy my, dat ick den geheelen mensch ghesont gemaect heb opten sabboth? ⁺

+ Deute. i.c

24

⁺En wilt niet oordeelen nae dat aensicht, maer oordeelt een rechtwaerdich oordeel.

+ D

25

Daer om seyden sommige van die Hierosolymitanen. En is dyt nyet dye gheen, die si soecken te dooden,

26

maer siet hi spreect openbaer, ende si en seggen hem niet. Oft die princen ooc hebben bekent voorwaer, dat dese waerachtich Christus is?

27

Maer desen weten wi van waer hi is: als Christus comen sal

[p. G7r]

so en weet nyemant van waer hy is.

28

Daer om riep Iesus inden tempel, leerende ende seggende. Ende mi kent ghi, ende ghi weet van waer ick ben. Ick en ben van mi seluen niet gecomen, maer hy is waerachtih die my gesonden heeft, de welcke ghi niet en kent,

29

mer ick kenne hem. Ende seyde ick dat ick hem niet en kenne, ick sal ws gelijc zijn, logenachtich maer ic kenne hem, want ick van hem ben, ende hy heeft mi gesonden.

30

Daer om sochten si hem te vanghen, ende nyemant en heeft handen in hem geslagen, want zijn vre en was noch niet ghecomen.

31

Ende veel van dye scharen hebben in hem gelooft. * Ende seyden. Als Christus comen sal, sal hi oec meer teekenen doen dan dese doet.

32

⁺Ende die pharizeen hebben gehoort, dat die schare dese dingen van hem murmureerden.

+ Ende dye pharizeen ende princen hebben dienaers ghesonden, dat si hem vangen souden.

+ E

33

Daer om heeft Iesus haer gheseyt. Noch een weynich tijts ben ick met v, ende ick gae tot hem die my gesonden heeft.

34

Ghi sult my soecken ende nyet vinden, ende daer ick ben, daer en moecht ghi niet comen.

35

Daer om hebben dye Ioden onder haer gheseyt. Waer sal dese gaen, dat wij hem niet vinden en sullen? Sal hy oec gaen in dye verstroyinge der heydenen, ende leeren die heydenen?

36

Wat sermoen is dit, dat hi geseyt heeft, ghi sult mi soecken ende niet vinden, ende daer ick ben, daer en moecht ghi nyet comen?

37

⁺Ende op den laetsten groten dach des hoochtijs: stont Iesus ende riep, segghende. Ist dat yemant dorstet, laet hem tot mi comen, ende drincken.

+ F

38

Die in my ghelooft, als die scrift seyt, vloeden des leuenden waters sullen van zijn buyck vloeyen.

39

Ende dat seyde hy vanden gheest, dye welcke si ontfanghen souden die in hem ghelouende waren. *

Want die heylige geest en was noch niet ghegeuen, want Iesus en was noch niet gheglorificeert.

40

Daer om veel van die scare, als si dese woorden gehoort hadden, seyden si. Dit is waerachtich een propheet.

41

Die ander seyden, dit is Christus: maer sommige seyden Sal Christus comen van Galileen?

42

En seyt die scrift niet, dat Christus comen sal wt dat zaet van Dauid, ende van Bethleem, tcasteel daer Dauid was?

43

Daer om isser een twist onder de schare gecomen om sinen wille.

44

Ende sommige wt haer wouden hem vanghen ⁺ ende nyemant en heefter handen in hem geslaghen.

+ G

45

Ende die dienaers zijn ghecomen totten ouerste priesteren, ende pharizeen, ende [kolom] si hebben tot haer geseit. Waer om en hebt ghi hem niet ghebrocht?

46

Die dienaers hebben gheantwoort. Noeyt en heeft mensche alsoe ghesproken als dese spreect.

47

Daer om hebben dye phrarizeen haer gheantwoort. Sijt ghi oeck verleyt?

48

Heefter oeck yemandt vanden princen in hem ghelooft, oft wt den pharizeen?

49

Mer dese schaer, die de wet nyet en weet, is vermaledijt.

50

Nycodemus seyt tot haer, die selfde, die tot Iesum inder nacht gecomen was, welcke een wt haer was. ⁺

+ Deute. i.c.

51

Oordeelt oeck onse wet een mensch, ten si dat si eerst van hem gehoort ende geweeten heeft, wat hi doet?

52

Sy hebben geantwoort ende hem geseyt. Sijt ghi oeck niet een Galileesch: ondersoect, ende besiet die scriften, dat van Galileen gheen propheet op en staet.

53

Ende een yegelijck is tot zijn huys gegaen.