De Vorsterman Bijbel

[p. M8r]

Hier nae volcht die Epistel die de Apostel Sinte Pauwels gesonden heeft tot Titum sinen discipel.

[kolom] Hier begint die Epistel die sinte Pauwels gesonden heeft tot Titum sinen discipel.

§ Dat eerste Capittel.

1

⁺PAulus knecht gods: Apostel Iesu Christi, na dat ghelooue der wtuercoren Gods, ende kennisse des waerheyts: welcke is na dye goddiensticheyt,

+ A

2

tot hope des eewigen leuens het welcke belooft heeft die niet lieghen en mach, God voor eewighen tijden.

3

Ende heeft zijn woort openbaer ghemaect op zijn tijt, door dye prekinghe, welcke my betrout is nae tbeuel Gods ons salichmakers.

4

⁺Tyto den lieuen soon na den ghemeenen ghelooue. Gracie, ende vrede: van God den vader, ende den Heere Iesu Christo, onsen salichmaker.

+ B

5

Om dese saeck heb ic v in Creta gelaten, dat ghy verbetert datter gebreck is, ende dat ghi in allen steden priesteren schict gelijcken ick by v geschict hadde.

6

Ist dat yemant is onstraflic, eens wijfs man, gelouige kinderen hebbende, niet berucht van die sonde van oncuysheit: oft niet rebellich.

7

Want een bisscop moet sonder misdaet zijn, als een wtleyder gods, niet houerdich, niet toornich gheen wijnsuyper, gheen slager, niet begeerich na scandeliken winsel,

8

⁺maer gheern herberghende minliken: sober: rechtuerdich heylich: reyn van leuen,

+ C

9

houdende het ghetrouwe woort welck nae die goede leeringhe is, op dat hy ooc machtich si te vermanen door rechte leeringhe ende den wederseggers te berispen.

10

Wanter veel ongehoorsame: ydel clappers: ende verleyders zijn, aldermeest die ghene dye wter besnijdinghe zijn,

11

welcken moetmen den mont stoppen, dye geheele huysen verkeeren, leerende dat nyet en behoort, om den schandeliken ghewinne.

12

⁺Een van dese heeft geseyt haer eyghen propheet. ⁺ Die van Creta zijn altijt logenachtich, quade beesten trage buyken:

+ D

+ Epimenides poeta

13

dat getuychnis is waer. Om welcke saet soe straft haer strengelick dat si oprecht zijn int gheloof,

14

nyet lettende op Iootsche fabulen ende gheboden der menschen, dye hem van dye waerheyt keeren.

15

Den reynen ist al reyn. ⁺ Den onreynen ende onghelouigen is niet met allen reyn, maer besmet is haer verstant ende consciencie.

+ Ro. xiiij.d

16

Sy belijden dat si God kennen, maer met dyen

[p. M8v]

wercken versaecken zijt. Als si zijn veracht ende ongheloouelijck, ende tot allen goede werck onbequaem.