Helena comt int lijden door het bedrijf van d'oude Coninghinne.
ONtrent deser tijt heeft Coninc Hendrick brieven ghekreghen dat een van zijn beste vrienden bevochten werdt van sijne vyanden Ende als hy de brieven ontfangen had, soo bereyde hy hem met grooter heyr kracht, ende maeckte den Hertoghe van Clocestre Ruwaerdt van Enghelant, ende den Koninck dede maken dry ghelijcke silvere seghels den eenen behielt hy self den anderen gaf hy Helena, den derden zijnen Ruwaert den Hertoghe van Clocestre, hem bevelende alle zijn goet, ende landen want hy den Hertoghe betroude bouen al zijn ander Heeren, ende heeft soo ten lesten hem ghereet gemaeckt, ende oorlof ghenomen aen Helena, ende aenden Hertoge, ende aen alle zijn Heeren, hen biddende dat sy zijn lant, ende sijn volck ghetrou wilde sijn ende is doen vertrocken.
Als koninc Henrick gereyst was soo quam de oude Koninghinne sijn Moeder dickwils int Hof om Helena te besoecken want sy groot ginc van kint. Soo gevielt op eenen tijt dat de oude Koninghinne was by Helena geseten, ende leyde helenaes hooft in haren schoot, so dat helena in slape viel. Doen nam de oude tremaschele Helenaes seghel uyt haer borse. Ende als Helena ontwaeckte namse aen haer orlof, ende dede halen eenen Goutsmidt die den seghel konterfeyte daer niemant af en wist dan sy ende den goutsmit, den welcken als den seghel volmaect was sy selver doodt stack, ende werp hem in't water wt een venster. Ende doen is sy terstont weder gekomen, ende heeft ten Helena in haer borse ghesteken sonder haer weten.
Auteursrechtvrij