De Vyftien mysterien van den rosen-crans van die H. Maget Maria
(1636)–Anoniem Vyftien mysterien van den rosen-crans van die H. Maget Maria, De– Auteursrechtvrij
[pagina 11]
| |
Wy bidden u Ionckvrou demoedichlijck,
Wilt helpen gnadichlijck, ons kinders hier aensiet,
Laet ons verderven niet,
Op dat wy leven in des Hemels throe.
In alle tijt sijt ghy gebenedijt,
Ghy van der Slangen list sijt vry ghewesen,
Door uwe gonst die vrucht die ons God schonck,
Wy arme sonders bloot zijn gansch genesen
Wt Iesse zijt ghy geboren,
O Ionckvrou zart wt Conincklijcker aert,
Doch uwe Kerck bewaert in deze elend hart,
Mijn ziel in uwe hant
Neemt op dat niet ant end zy werd verloren.
O clare Son verlicht u dienaer schoon,
Wilt ons sonders onrein by Godt versoenen
Wt swarer pijn voert ons den hemel in,
Dat Godt door bidden dijn ons wil verschonen,
Helpt ons in s'Hemels throne,
Reyckt uwe hant, breeckt onser sonden bant,
Verkricht ons t' eewich pant dat wy ins' Hemels lant
Daer in ghy wel bekant
By u soo triumphant steets mogen wonen.
Voor uwen loon, van twelf sterren een kroon
Boven de Engelen schoon hebt ghy ontfangen
O schone Maen Godt Vader ende Godt Soon
Des heyligen Geestes throon heeft u ontfangen
Siet hoe wy zijn vergeven,
In desen dal met sonden menich falt,
Met smert en pijn en quael, bewaert ons van de val
Helpt ons int s'hemels sael,
Dat wy u loven al int eeuwich leven
|
|