Hoe dat die Lukenners, Wals-Brabanders ende Henewiers weder rebelleerden teghen Julius Cesar.
Dat V capittel.
Hier en binnen, ende ter wilen dat Julius Cesar in Brittangen becommert was, hebben rebelleert die Lukenners ende heel Wals Brabant, mit sommighe steden van Henegouwen, doer conspiratie ende informacie hoers cappeteyns ghenoemt Ambiorix, ende oec doer raet der burgeren van Trier, om hemselven weder te vrijen van den last ende diensticheit der Romeinen. Ende hebben in een oploop twee legaten der Romeinen, als Cotta ende Sabinus, die doe in den landen van Ludick laghen, mit alle hoer legioenen verslaghen; ende sijn uut deser victorien stout gheworden, treckende tot Cicebium. Den legaet van Romen, die doe overmits den winter lach mit sijn legioen op een swaer blochuis ende andere castelen bi die Maese, daer na menich tijt keiser Anthoninus Pius die stede van Hoye stichte. Ende waren mit alsulcker menichte van volck vergadert, dat si binnen drie uren tijts maecten alleen mit hoer swaerden ende messen een blochuis van X voet dick, ende een graft daerom van XXV voet diep ende wijdt, ende hadde in sinen ommeganck begrepen boven M passen; ende hebbent mit C ende XX toernen becingelt. Julius vernemende dat sijn volck in last was, ende dat die ene legioen verslaghen was, ende die ander bina verteert ende ghesleten doer tvier dat die Lukenners mitten horen worpen in der Romeinen sloten ende aerthusen, is hi gecomen haestelick mit twee versche legionen omme Cicebium te ontstetten. Dit horende Ambiorix mit alle sijn volc, is opghebroken van den belegge, ende isser medeghetogen na Julius heer toeGa naar voetnoot142, om hem haestelick ende onversienlicke te overvallen. Julius ghebrukende sijn gewoenlicke cloecheit, heeft hem ende sijn volck in veel cleine sloten mit opset besloten, mer hi sende voer een deel reysigers, die hem souden veinsen te vlien, om alsoe den vianden te locken over die valeye, den Julius periculoes sceen te wesen, totter anganck des strijts, die doe middel tusschen hem beyden lach. Ende siet, doe die Romeinen over den valeye waren, sloot Julius alle die poorten sijnre castelen ende blocsen toe. Dit siende die Lukeners, meenden dat sij tal ghewonnen hadden, ende begonnen van buten dier sloten een te bestoppen. Mer Julius sliep niet, ende quam tot allen plaetsen mit alleGa naar voetnoot143 sijn volck haestelijck uutborsten, ende heeft den Walen voervluchtich ghemaect, ende heefter wel LX M verslagen. Ende die ontgaen conden, hebben hem verhudet in marasschen ende wildernissen.
Auteursrechtelijk beschermd