Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hier beghint die III divisie ende heeft XCV capittelen.
Paeusen.
Anno VI C ende LXXXVIII.
Dat I capittel

Sergius deersten van dier namen was die LXXXVII paeus, ende sat XIII jaer, VIII maenden ende XX dagen. Hi was een man van groter heylicheit ende leringe, ende in der electie om een paeus te kiesen was grote twedracht; want Theodorus ende Paschalis hadden oec stemmen, mer uut die wille des heren quamen die parthien overeen, dat dese Sergius paeus bleef. Doer heylicheit ende tgebet van desen paeus, bi naersticheit des edelen hertoech Puppijns van Brabant, zijn dye Sassens ende Vriesen overmidts predicacie ende leringe des heyligen aertsbiscops Willeboort van Uutrecht, denwelcken dese Sergius consecreerde ende wide, totten heiligen kersten gelove gecomen, als men int lange na horen sal. Nadat hi Sinte Leo des eersten paeus lichaem vervoert hadde tot Wirtzenburch, starf hi ende wert mit groter wenen tot Sinte Pieters begraven. Die Stoel vaceerde III maenden.

Joannes die VI was die LXXXVIII paeus ende sat III jaer ende III maenden. Dese, als sommige willen seggen, is martelaer gestorven, mer van wien oft waer om en weet men niet. Hi leit tot Sinte Sebastiaen begraven. Die Stoel vaceerde L dagen.

Joannes die VII was die LXXXIX paeus, ende sat II jaer, VII maenden, XVIII dagen, ende was een heylich ende wel sprekende man. Hi timmerde in Sinte Pieters Kercke een oratoer mit een outaer, daer hi onder begraven wert. Tpaeusdom vaceerde III maenden.

[p. 52r]

²¹⁸ Sisimus was die XC paeus, ende sat niet langer dan XX dagen. Ende hoewel hi gaen noch staen en mochte, overmits dat voetevel, nochtans en versuymde hi niet te doen datter behoerde totter welvaren ende oerbaer der stat ende sijnre ondersaten. Hi is haestelic ghestorven ende tot Sinte Pieters begraven. Tpaeusdom vaceerde II maenden

Constantinus deerste van dier namen was XCI paeus ende sat VII jaer ende XX dagen. Hij was also goedertieren ende oetmoedich, dat hi van allen menschen bemint wert. In sinen tijden was tot Romen een grote duertijt, III jaer lang, in denwelcken hi den armen soe behulpelick was, dat si riepen dat hi uuten hemel ghecomen waer. Tot desen paeus sijn gecomen II coningen uut Enghelant van der Sassen gheslacht, ende renuncierden die werlt, ende sijn beyde monicken gheworden, ende storven salichlick. Onlanghe hierna starf dese paeus, ende wert tot Sinte Pieters begraven. Tpaeusdom vaceerde II maenden.

Gregorius die II was die XCII paeus, ende sat XVI jaer, IX maenden, XI dagen. Hi was een uutermaten seer geleert man, ende beschermer der geestliker saken. Dese paeus heeft doer sijn grote naersticheit ende brieven, den Duytschen totten heyligen gelove gebrocht, sendende hem tot enen leraer ende preker den heyligen man Bonifacium, die hi ghewijt hadde tot enen aertsbiscop van Ments, ende wert namaels die anderde aertsbiscop van Uutrecht, als men noch horen sal. Hi excommuniceerde ende dede in den banne den keyser Leo den Derden, omdat hi geboot alle dat keyserrijck doer, dat men der heyligen beelden verbarnen ende van den muren scrappen soude; daer hem die paeus seer teghen sette. In desen tijden begonnen die paeusen meer dan si gewoenlick waren in tijtliken dingen hem tegens den keyseren te versetten, om hoer ongheloefs willen, ende mede dat rijck te vervoeren van dat een volck totten anderen, na dattet den tijt eysschede waer, omdattet bekent wert, dat die princepael saeck van deser destructie des keyserrijcks is gheweest ketterie. Ende daerom anheng dat ghemeen kersten volck den paeus, ende dwongen den keysers hoer tyranscap ende ketterye te laten. Na vele goede wercken is dese paeus gestorven ende tot Sinte Pieters begraven. Tpaeusdom vaceerde XXXV dagen. Gregorius die III was die XCIII paeus, ende sat X jaer, VIII maenden, XXIIII dagen. Hi was een geleert man in Griexser ende Latijnser sprake. Hi dede tot Romen houden een concilium van M biscoppen, in denwelken hi condemneerde den keyser Leo den Derden, omdat hi die beelden der heyliger verbarnde ende destrueerde. Ende heeft int selve²¹⁹ concilium ingesettet, dat men der heylighen beelden eren sal, ende haer violatoers ghebannet. Hij starf, ende wert tot Sinte Pieters begraven.

218 XLVII AB.

219 selne AB.