Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Paeusen.
Anno VII C.XLII.
Dat XVI capittel.

Zacharias was die XCIIII paeus, ende sat X jaer, II maenden, XV dagen; hi was een seer geleert man, dat hi dat

[p. 59r]

boeck ghenoemt Dialogus, dat Sinte Gregorius die paeus ghemaect heeft, oversette uuten Latijn in Griecxs. Hi was een sachtmoedich ende gracioes man, mit vele duechden verchyert, ende vercreech mit sijnre beden ende informatie dat die coninc Luytprandus van den Lomberden resigneerde ende overgaf alle die steden ende sloten die sijn voervaders wel XXX jaren van der kercken van Romen beroeft ende ofgenomen hadden. Hi versette coninck Hildrijck van Vrancrijc, ende beroefde hem van der cronen, ende versach daermede den hertoge Puppijn die Cleine van Brabant, ende dede hem van den eersten aertsbiscop van Ments, genoemt Bonifacius, ende na aertsbiscop van Uutrecht, salven ende wyen tot enen coninc van Vrancrijc, want hi den volcke nutter ende profitelicker was. Hier mach men mercken hoe groot dat in dese tijt des paeus macht geweest is, doe hi dat vermaerde rijck vervreemde ende beroefde van den warachtigen erfghenamen, ende brochtet ende gaft desen Pipinum. Na vele goede wercken ende exempelen is hi gestorven ende wert tot Sinte Pieters begraven.