Hoe dat coninc Puppijn van Francrijc confirmeerde alle die donacien245 ende giften die sine ouders der kercken van Uutrecht gegont ende gegeven hadden.
Dat XXI capittel.
Puppijn die Cleine, hertoge van Lotrijc ende Brabant, als hi bi consent des paeus Zacharias van Romen ende der princen ende vorsten des conincrijcs van Francrijc bi handen van des eerwaerdigen vaders Sinte Bonifaes tot enen coninc van Francrijc gewijt ende consecreert hadde, heeft hi desen eerwaerdigen vader ende biscop verleent ende gegeven vele rechten ende privilegien, ende daertoe confirmeert alle die goeden die Kaerl Marteel, zijn vader, der kercken van Uutrecht gegeven hadde in deser formen: Wi, Puppijn, coninck van Francrijc, ist dat wi die behoerlicke supplicacien der priesteren niet en weygeren, hopen wi van God dairvan geloent te worden, ende om dit loon te vercrigen heeft ons gebeden die eerwaerdige man ende here Bonifaes, aertsbiscop van Uutrecht, dat wi wouden vernyewen ende confirmeren alle die ghiften ende gaven der heyliger kercken des stats van Uutrecht, gelegen opten Rijn, die onse voervaderen Puppijn van Harstel, Kaerle Marteel ende Kaerleman gegeven hebben, waerom so hebben wi Puppijn, coninc van Francrijc, mit gracelicker gonsten confirmeert alle die goeden, renten, thienden, thijnsen comende van den tollen ende comanscepen oft van anderen dingen, toebehorende der kercken ende Goedshuse des eerwaerdigen here Bonifaes, aertsbiscop, tot behoef der canonicken ende geestlicke mannen, die mit stadiger leren ende predicacien dat ongelovige volc totten heyligen kersten gelove brengen, ende mits die barmherticheit Goeds daerin houden. Diewelcke goeden, renten, thienden ende chijnsen Puppijn, Kaerle ende Kaerleman mit horen open brieven ende instrumenten daertoe gegeven ende assigneert hebben: Wi confirmeren ende approberen ende daertoe oec geven