Hoe dat Theodardus ghecoren werdt die vijfte bisscop der kercken van Uutrecht.
Dat XXXVI capittel.
Theodardus, geboren uut Frieslant, wert na des heyligen mans doot Adelbricus, gecoren ende geordineert te wesen die V biscop van Uutrecht, een man van groter sciencien ende leringe, ende een excellent ende vermaert preker. Hi was seer naerstich ende sorchvoudich mit zijnre leringe ende heylige conversacie den ongelovigen Friesen te bekeren, arm van geeste, rijck ende milt in aelmissen te geven, volstandich in vasten, in waken, in heylige meditacien ende oeffeninge alre doechden. Ende is int eynde gracelic overgheleden ende gestorven, int jaer ons Heren VIII C, ende wert mit groter eren begraven in Sinte Salvatoers Monster, bi sinen voervaders ende heylige biscoppen.