Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat coninc Kaerle die Hunen bedwang ende tlant destrueerde.
Dat LVII capittel.

Daerna, int jaer VII C ende LXXXIX, coninc Kaerl merckende dat die Hunen wonende in Clein-Pannonien, dats Hongerien, daer die rivier van der Danouwe verby loept (hebbende int oest Gallacien, int west Dalmacien ende Ytalien, int suden die Griecken ende int noorden Duytslant) altijt in zijn landen onverwinlicke scaden deden, ende sine ondersaten mit roof ende brant seer lastich waren, dede hi vergaderen een generael dachvaert in der stat van Worms opten Rijn, ende versamede een groot heer van die alre starckste vroomste ende cloecste strijtber mannen dye hi conde vinden, die hi ordineerde in III scaren ende battaelgen: die eerste battaelge regierde hertoge Dyderick, die anderde hertoge Magnifreet, ende togen te samen in de provincien

[p. 71v]

van den Hunen noortwert leggende by der Danouwe. Mer die coninc selve toech mit dat III heer doer dat suyteinde van Beyeren, tot hi quam mit zijn volc opten rivier Thanese genoemt, die horen loop heeft tusschen tlant van Beyeren ende Hongerien, daer doe die Hunen inne woenden. Ende als die coninc alle zijn princen ende heren mit dat volc van wapenen bieenvergadert hadde, geboot hi hem allen, dat si III dagen rusten souden, biddende God mit dieper oetmoedicheit ende devote gebeden, dat Hi Zijn volc, die om Sinen gelove te bescermen ende te vermeren in also verden ende vreemden landen getogen waren, wilde behouden, behoeden ende salveren. Na welke III dagen heeft hi mit sine battaelgen tot allen einden opten Hunen geslagen, bevochten, verjaecht ende verwonnen, destruerende ende verwoestende alle haer blochusen, fortressen, steden ende sloten, ende liepen alle tlant doer, mitten viere ende swaerde, ende en spaerden niement. Ende na desen is die coninc weder mit alle zijn volc mit groten zege ende victorie in Beyeren gecomen. Terwilen dat die coninc aldus in der Hunen lant was, so waren seer sorchvoudich ende naerstich te bewaren die heren ende princen, alle des conincs scepen, mit sine vitaelge ende provande, mit alle sine bogagen ende costlicheden, ende dienden des conincs heer seer vlitelic van allen datghene dat hem van node ware, ende si van doen hadden. Ende die coninc bleef die hele winter in Beyeren in die stat van Regensburch, ende hilt daer die feestlicke hoochtiden van den heyligen Kersdach ende Paesdach.