Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die Sassens nu weder rebelleerden, ende hoe si sonder strijt in ghenade des conincx ghingen.
Dat LXI capittel.

In den jare VII C ende XCIII hebben die Sassens den coninc weder grote injurie ende leet gedaen, want si verslogen den vromen hertoge Dierick mit sijn volck, treckende mitten coninc doer Frieslant, in een dorp geheten Hirvisti, daer si hem lagen bi der riviere van der Wesar gheleit hadden, ende vervolchden alle des conincx zoudenieren ende volc van wapenen daer si conden ende mochten, ende verdreven se uut horen landen. Mer die coninc veinsde of hem daer niet om geweest en hadde, ende maecte alle die somer doer sine steden ende sloten starck, want hi overmits den stadigen regen in dat jaer anders niet doen en mochte. Mer des jaers daeran van XCIIII versaemde hi een groot machtich heer ende volc van wapenen, om desen rebellen Sassens te be-

[p. 72v]

dwingen ende van hoere insolencien ende misdaet te corrigeren. Ende quam int lant mit twe scaren ende battaelgen, van denwelcken hi die ene selver in persone regeerde, ende quam daermede doer die suytsijde van Sassen. Den anderen battaelge voerde Puppijn sijn soen, ende quam in Sassen doer die noortside, ende quamen te samen bieen in een²⁸¹ groen velt, dat die Sassens hieten Sinochvelt, daer si vonden een grote menichte van Sassens al bereit om tegen den coninc te striden. Mer als die Sassens oversagen des conincs grote menichte van volck ende sine ordinantie, worpen si hoer wapen van hem, ende maecten groeten onscult, begerende mit gebogen knien genade ende remissie van alle haer excessen ende misdaden. Ende beloefden mit swaren eede ende onderpant hoerre edelen nijmmermeer tegen den coninc weder te rebelleren. Die coninc dit siende wert in der herten tot goedertierenheit bewegen, ende vergaf hen alle hoer misdaet; ende quam weder tot Aken mit groter triumphen.

281 eeen AB.