Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat coninc Kaerl sinen soen Lodewyck sende in Spangen ende van vele princeliken ende coninclicke presenten die hem van vele geestelike ende wertliken personen presenteert werden.
Dat LXIII capittel.

Hierna, int jaer VII C ende XCVI, nadat paeus Adrianus gestorven was, wert in sijn stede gecoren Leo die Derde, die in sijn eerste jaer voerscreven sende tot coninc Kaerl Sinte Peters slotel ende den bannier van Romen mit veel giften ende gaven, diewelken die coninc als Patricius, voecht ende gonvernoer van Romen minlic ontfing, welke digniteyt hi van den paeus Adriaen onlancs te voren ontfangen hadde. In ditselve jaer van XCVI quam tot coninc Kaerl een Saraceen ende prinche der stat Barcimoene, genoemt Zatus. Dese was een hertoch van een deel lants in Spangen ende gaf hemselven ende sijn lant geheel in des conincs handen. Doe dit alle die andere Saracenen van Spangen vernamen, hebben si heimelic mit cloecheit die stat Barcimoen mitten hele hertoechdom ingenomen, ende en wouden onder die Franssen niet staen. Die coninc dit horende, heeft sijn soen den doerluchtigen prince Lodewijck, coninc van Aquitanien, gesent mit een swaer volck in Spanghen, ende nam die stat voorscreven weder in, ende toech vandaen in een grote stat in Spangen, Osten genoemt, die mit XC toornen bevest was. Mer hi en mocht se niet winnen, overmits die starcke ende vrome resistencie ende wederstant der Saracenen. Dijergheliken heeft die coninc van Persen, Aaron (die een heer was bina van heel Azijen, uutgenomen Indien) vrientscap begeert²⁸³ mit desen coninc Kaerl, ende sende tot hem die lichamen van Sinte Cipriaen ende Sperate, martelaren, mit Sinte Panthalions hooft. Voert meer sende den coninc die patriarch van Hierusalem tot een sonderlinge benedictie die sloetelen van tHeylige Graf ons Heren, van den berch van Calvarien ende Oliveten, mit die sloetelen van der stat ende bannijer. Op dese tijt is oec tot coninc Kaerl gecomen Abdella, coninc der Moeren, brengende mit hem onsprekelicke gaven, te weten tenten ende papilionen van zijde, ende menigerhande verwen ende colueren, seer

283 begerrt AB.

[p. 73r]

groot ende schoen; een wonderlick ende onbegripelic orologium oft uijrwercke mit XII veinsteren, uut welcker ijghelick een paert oft henxst uute quam riden ende sloot mit sijn uutganck den openen veinsteren toe; vele andere wonderlicke dinghen, van clocxkens, bellekens ende andere instrumenten die men in dit werck sach. Onder dese gaven ende ghiften des conincs der Moeren waren oec II candelaren van latoen oft messing die seer groot ende hooch waren. Ende coninc Kaerl ontfing desen coninc Abdella der Moeren seer blidelick ende minlic, ende hilten bi hem langhe tijt in groter eren. Hyerenbinnen is coninc Kaerl ghetoghen in Sassen mit sijn edelen, ende sloech sine tenten op by die riviere van der Weser; mer die coninc bleef mit sijn princen int slot Heristal, dat hi selver daerbi ghetijmmert hadde. Tot welcke plaets quam bi den coninc uut Italien coninc Puppijn, zijn soen, coninc van Ytalien, ende Ludowijc zijn ander soon, coninc van Aquitanien, comende uut Spangen, myt Haldefons, coninc van Asturien, dye tot coninc Kaerl brochte vele costelicke gaven ende presenten, mitten welcken ende zijn sonen voornoemt coninc Kaerl seer vrolic was, lovende God mit dieper oetmoedicheit van der vermeringe Zijns heylighen gheloves. Ende ten lesten heeft hi Abdelle, coninc der Moren, weder thuijs ghesent doer zijn soon Lodewijc ende andere princen, ende heeften gheeert ende begavet mit coninclike cleinoden ende costelike presenten ende gaven. Dierghelic dede hi oec den anderen princen, die uut vreemde landen by hem ghecomen waren, by zijn soon Puppijn wederom thuijs gheleyden mit groter feesten ende eerlicheit, begaeft wesende myt costlike presenten, cleinoden ende juwelen. Mer coninc Kaerl bleef stadelic mit groot volc van vapene in Sassen alle die somer ende winter, ende verneerde se also seer, dat sij teghen den coninc niet en dorsten opstaen noch versetten, ende dwanc se daertoe, dat sij zijn volck van vapenen moesten besorghen alle vitaelge ende provande, ende daertoe alle hoer soudijen ende maentgelden.