Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die paeus Leo quam by den²⁸⁶ coninc in Sassen ende voert tot Aken, daer hi wijede Onser Vrouwen Kerke, ende institueerde die vermaerde pelgrimage alle VII jaren.
Dat LXV capittel.

Int jaer VII C XCVIII toech die coninc van Aken mit sine ostagieers oft edelen, die hem te pende geset waren tot Padeborn, ende sant sinen soen Kaerl mit volc van vapenen doer heel Sassen, tot die riviere Albia, om tlant te vernijelen ende verwoesten. Die coninc in der stat van Padeborn wesende, quamen aldaer bi hem die Wiltzen ende Obdoriten, des conincs getrouwe²⁸⁷ vrienden, om mit hem te tracteren enige sware saken, hoe sij best vredelic souden mogen leven mitten Hunen ende Sassens. Terwilen die coninc hier was, vernam hi doer scriften des hertoges van Spoleten dat grote misval, injuri²⁸⁸ ende overlast dat die Romeinen den paeus Leo hadden gedaen. Waerom dat die coninc mit dieper oetmoedicheit begeerde mit scriften dat die paeus hem wilde

286 dan AB.

287 grtrouwe AB.

288 ininri AB.

[p. 73v]

gewaerdigen bi hem te comen tot Paderborn, want hi persoenlic sonder afterdeel van theylige geloef vandaen niet en mochte sceyden om saken voorscreven. Also, dat dye eerwaerdighe paeus Leo mit een eerlike familie quam in presencie des conincs, ende bleef bi hem een wijl tijts, ende toech mitten coninc doer Duyslant ende Walslant, ende wijede overal vele kerken, altaren ende cloesteren. Ende bi sonderling mit groter staet, solemniteit ende feeste, consecreerde ende wijede hy die kerc tot Aken, die die coninc mit groter costen fondeert ende gesticht²⁸⁹ hadde in die ere Onser Liever Vrouwen. Tot welker feesten ende widinge quamen vele geestelike prelaten uut Duyslant ende Valslant ende vele waerlike vorsten ende heren. Ende daer stonden bi den paeus voornoemt, wel C biscoppen, mit veel abten ende geestelike personen; ende die paeus gaf tot deser kercwijdinge grote oflaten ende gracien, ende insette die vermaerde pelgrimage tot allen VII jaren eens, tot verlatenissen ende quitsceldingen van allen sonden, om te versoeken die heylige reliquien ende heylichdommen, die men daer thoent. Na welker widinge begaefde die coninc desen paeus Leo mit coninclike giften ende costlike presenten, tot eer van Sinte Peter, sinen princenpale patroon, ende senden weder tot Romen mit eerlic geselscap sijnre princen.

289 gestichtict AB.