Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Paeusen.
Anno VIII C ende XVI.
Dat LXXV capittel.

Stephanus die IIII van dier namen, was die C ende een paeus van Romen, ende sat niet meer dan VII maenden. Ende als hi III maenden paeus hadde geweest, reysde hi van Romen tot Orliens in Francrijcken, daer hi mit groter eren ontfangen worde. Ende croonde aldair den coninc Lodewijck van Franckenrijck, ende salvede hem tot enen keyser van Romen. Ende is weder vandanen gereyst tot Romen, begaeft ende beghift wesende mit een groot costlic gouden cruys, verchiert mit duerbaren ende preciosen gesteenten, dat keyser Lodewijck besproken ende gegeven hadde tot verchieringe van Sinte Pieters Kerck. Dese paeus is heilichlic gestorven, ende wert tot Sinte Pieters begraven.

Paschalis, van dier namen deerste, was die C ende II paeus, ende sat VII jaer, III maenden ende XVII dagen. Hi dede grote naersticheit om die reliquien ende lichaem der heyliger martelaren te vinden ende op betamelicker plaetsen te setten. Hi vant doer Sinte Cecilien openbaringe haer lichaem mit gulden clederen bedect, ende dat lindelaken mit bloet besprenget, ende die lichamen van Valeriaen, horen brudegom, ende Tiburcius sijns broeders ende Urbanus des heyligen paeus, ende brocht die in Sinte Cecilien kerck, dye hi gesticht hadde. Na vele doechtlicke werken starf hi, ende wert tot Sinte Pieters begraven³¹⁰. Eugenius die II was die C ende III paeus, ende sat III jaer, II maenden. Hi plach der armer

310 bgeraven AB.

[p. 78v]

weduen ende wesen saken also vromelic ende naerstelic te berechten, dat hi mit groter lof der armen vader genoemt wert. Nochtans worden hem van bose ende quade menschen die sine goede wercken beniden, sine ogen uutgesteken, ende deden hem an grote pinen, dat sommige meinen dat hi martelaer gestorven is. Ende sijn lichaem wert mit groter droefheit tot Sinte Pieters begraven.

Valentinus was die C ende IIII paeus, ende sat niet meer dan XL dagen. Hi was van sulker heilicheit, religie ende leringe, dat hi van een diaken tottet paeusdom gecomen is. Mer corts starf hij, ende wert tot Sinte Pieters begraven.