Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die heylige biscop jammerlick vermoort wert om die rechtvaerdicheyt.
Dat LXXXVII³³¹ capittel.

Lodewijck die keyser, overmits des heiligen biscops scadelicken straffens, ontsach hem langer in die landen te bliven mit sinen ongeorloofden wive, die seer arbeyde om den heiligen biscop tot anderen sinnen te keren, om consent te geven tot desen huwelicke, tempteerden seer mit bidden, smeken ende mit vele costlicke presenten ende gaven. Mer hij en was niet te bemorwen, mit woorden, noch mit gaven; hi en meende dit ongeoerloefde huwelick te sceyden, ende sende den keyser enen behaechlicken brief uut vaderlicker lieften, eer hi den banne op hem leggen wilde. Die keyserinne dit vernemende wert si mit toornicheyt ende nyde seer ontsteken opten heyligen biscop, ende boven al hoer broeder vresende dat sijn suster van den keyser versteken ende begeven soude worden; waerom dat si twe ordineerden ende sloten hoe si best desen heyligen man ter doot souden brengen. Ende huerden II bose gesellen ende scalcken, om den biscop doot te slaen, belovende hem te geven groot ghelt. Ende sijn ghecomen tot Uutrecht, ende hebben desen heyligen biscop na der missen in Sinte Jans Evangelisten sacristie³³² tot Sinte Salvatoors ter doot toe ghewont, ende sceyden haestelic vandaen. Die biscop aldus gewont, dede vergaderen die ecclesie van Uutrecht, ende sprac se troostelicken toe, ghevende hen allen zijn vaderlicke benedictie, ende seyde: 'Mijn lieve broeders ende kinder, vercrijch ic eenich deel in den hemel mitten heyligen martelaers, so sal ic voer u bidden om uwe salicheit; ende dat u God behoede voer alle toecomende plaghen. Want om der keyserinnen sonden wille, die hier te lande woent, so sullen die Denen ende ongelovighe heydenen comen ende destrueren ende verwoesten alle dit lant mit roof ende brant.' Ende met desen woorden ghing hi in die crofte tot Sinte Salvatoers, voegende hem selven in een

331 LXXX AB.

332 Aldus C; sacrificie AB. Zie ook Beke, Croniken, XXIV:89.

[p. 83r]

sarcke, ende began selver te lesen den eersten psalme van der vygelien mitten antiffen, seggende aldus: 'Ic sal behagen den Heer int rijck der levender' ende daermede gaf hi den geest, int jaer ons Heren VIII C ende XXXVIII opten XVIII dach in julio, als hi dat bisdom mit doechtlicke exempelen ende salige leringe hadde berecht II jaer, doir wiens verdiensten noch huden des dages veel miraculen geschien tot lof ende eer des Naems ons Heren Jhesu³³³ Cristi. Die biscoppen beyde in Walslant ende Duytslant vernemende den onsculdigen doot des onnoselen martelaers verbonden hem te samen om den overdaet des keysers ende des ondadigen wijfs. Gregorius, paeus, die IIII, als hi dit vernam, quam neder in Francrijck; ende alle die biscoppen by hem. Ende die keyser wert van sine keyserrijke ende sijnre cronen beroeft ende in een cloester ghesteken, daer hi penitencie dede. Ende Yesse³³⁴ die biscop van Amiens, gaf der keyserinne een wijle opt hoeft, ende sette se in een nonnecloester, om penitencie te doen.

333 ihesn AB.

334 Yeffe (schijnbaar) AB.