Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Paeusen.
Anno VIII C LVI³³⁷.
Dat XCII capittel.

Benedictus die III was die C ende IX paeus, ende sat omtrent III jaer. Dese is na sine wercken ende name gebenedijt ende heylich geweest. Hij nam dat paeusdom seer onwillicken an, protesterende God almachtich mit tranen, ende biddende hem mit III dagen vastens, dat hi hem gonnen wilde dye Heylige Kercke te regeren tot sijnre eren ende der kersten salicheyt. Hi gaf hem sere den vervallen kercken te repareren, den ellendigen te troosten, den sieken te visiteren, den armen te voeden ende weduen te helpen, waerom dat hi allen menschen lieflic ende angenaem was. Mit dusdanige goede wercken is hi gestorven, ende dede zijn lichaem uut groter oetmoedicheit voer Sinte Pieters kerckdoeren begraven.

Nicalaus, die eerste van dier namen, was die C ende X paeus, ende sat X jaer. Dese was den heiligen³³⁸ man Sinte Gregorius in allen gelijck, want hi wert in sine absencie, overmits sijn heylicheit, gecoren, ende verhoede ende verstack hemselven om gheen paeus te wesen. Mer want hi eendrachtlic gecoren was, en konde hijts niet of wesen, noch weygeren. Hi heeft vele goede puncten in gheset in presencie ende consent des keysers Lodewijcs. Ten lesten is hi in allen dingen volmaect gestorven, ende wert mede voer Sinte Pieters kerck begraven bi sinen voirsaet, als hi begeert hadde.

Adrianus die II was die C ende IX paeus, ende sat V jaer ende IX maenden. Dese was een seer goet man, liberael ende milt tegen den armen. Want eer dat hi paeus wert, ontfing hi van den paeus Sergius voorscreven enige penningen³³⁹ om die sine dispensatuer te gheven, ende voert den armen te delen. Die dispensatuer siende datter veel meer menschen waren dan pennigen, gaf se dese Adriaen weder, bevelende dat hi den paeus segghen soude, datter alte veel luttel ende weinich penningen waren om so groten hoop der armen menschen te geven. Adrianus nam mit groter betrouwen in God dese penninghen, ende gaf een yghelick arm mensch drie pennigen van der somme, ende brochte wederom totten dispensiere oft scaffennaer also veel pennigen als hi van hem ontfangen hadde; van denwelcken die scaffenaer sere verwonderde. Mer Adrianus sprac hem straffelic toe, ende seyde: 'O mensche van cleinder geloven, sietste nu wel hoe goedertieren ende milt God is in dengenen die den armen begeren te helpen.' Uut welker lof, prijs ende doechtlic werck dese Adrianus tegen sinen danck ende wille paeus gemaect is; dien Lodowijck die II, keyser van Romen, bi sine legaten eerlick dede groeten ende saluteren,

337 VIII LVI AB.

338 hesiligen AB.

339 pennigen AB.

[p. 85r]

ende gaf den burgeren van Romen voortan tot allen tijden een vrije electie paeusen te verkiesen, wanttet den vreemden niet kondich en is wie in een ander gemeente die beste ende bequaemste is. Dese paeus is na vele goede ende doechtlike wercken gestorven, ende wert mit groter eren in Sinte Peters kerck begraven.