Hoe dat die eerwairdige biscop oflivich worde.
Dat XI capitel.
Dese eerwaerdige ende heylige man Rathbout, biscop van Uutrecht, is in den jare Ons Heren IX C ende XVII gereist uut dat lant van Trenten ende is gecomen in Overysel in die stede van Oethmaesen, daer hy sonder enige merckelicke siecten te bedde gevallen is ende began enen suverlicken sconen antiffen te lesen van den heyligen confessoer Sinte Martijn dat hi selver gemaect hadde. In welcker bedinge dese heylige man op die III kalende van december salichlicken van deser werlt gevaren is totter vroechden des ewigen levens. In deser sware persecutien ende wrede vervolginge der Denen hadde die kerck ende dat bisdom van Uutrecht geregeert XVII jaer, ende worde van der ecclesie ende alle dat volc mit groter rouwen ende mit betameliker uutvaert tot Deventer gebrocht ende daer begraven. Hi hadde in sinen leven veel goets gedaen mit preken, mit leringe ende mit goeden exempelen, mits diewelcken hi waerdich is geweest ontfangen te worden in die glorie ende bliscappen der engelen. Dese waerdige biscop was geboren in Vrieslant in die stede van Lentegoe; hi verwerf van coninc Lodewijc van Romen ende van coninc Kaerle van Vrancrijc die confirmacie ende vestinge der stede van Deventer ende dat slot, ende mede der stede van Tiel mit die tollen ende mit allen sinen toebehoren; ende van coninc Coenraet van Romen ontfinc hi die confirmacie alle der emuniteiten, privelegien ende vriheden der kercken van Uutrecht, van keiseren ende coningen voertijts der voerseyder kercken verleent ende ghegeven.
Auteursrechtelijk beschermd
